Advertisements

ኮማንድ ፖስትና ተቃዋሚዎች ስምምነት ላይ ሳይደርሱ ተለያዩ፤ “ጥያቄ ተጠየቀ መልስ ተሰጠ… አዋጁን ተቀበሉ ነው”አቶ ሲራጅ ፈጌሳ”በፈረሰ ሀገር ህዝብ መምራት አይቻልም”አሉ

የአስቸኳይ ጊዜ አዋጁን ለማስፈጸም የተቋቋመው የኮማንድ ፖስት ሴክሬተሪያት ጽህፈት ቤት የተቃዋሚ ፓርቲዎችን ዛሬ ሰብስቦ አነጋግሯል፡፡ በስብሰባው ለተነሱ ጥያቄዎች ምላሾች ቢሰጡም ከውይይት እና ዘላቂ መፍትሄ ከመፈለግ ይልቅ “አዋጁን ተቀበሉ“ የሚል መንፈስ ነበረው በሚል ተችተውታል፡፡

ተቃዋሚዎች ውይይቱ “አዋጁን ተቀበሉ ነው” ሲሉ ተችተዋል

የአስቸኳይ ጊዜ አዋጁን አስመልክቶ ኮማንድ ፖስቱ ከተቃዋሚ ፓርቲ አመራሮች እና ተወካዮች ጋር ያደረገው የግማሽ ቀን ስብሰባ የተካሄደው በተወካዮች ምክር ቤት አዳራሽ ነበር፡፡ “ስብሰባው የተጠራው አንዳንድ የፓለቲካ ፓርቲዎች በአስቸኳይ ጊዜ አዋጁ ላይ ማብራሪያ እንዲሰጣቸው ባቀረቡት ጥያቄ ነው” ሲል የኮማንድ ፖስቱ ሴክሬተሪያት ለፓርቲዎቹ በበተነው የጥሪ ደብዳቤ ላይ ጠቅሷል፡፡ በምርጫ ቦርድ ዕውቅና አግኝተው የሚንቀሳቀሱ አብዛኞቹ ፓርቲዎችም በስብሰባው ላይ መገኘታቸውን በቦታው የነበሩ ለዶይቸ ቨለ ገልጸዋል፡፡

ስብሰባው የተመራው በመከላከያ ሚኒስትር እና የኮማንድ ፖስቱ ሴክሬተሪያት አቶ ሲራጅ ፈጊሳ ነው፡፡ በተወካዮች ምክር ቤት የመንግስት ተጠሪ ሚኒስትር አቶ አስመላሽ ወልደስላሴ እና የአስቸኳይ ጊዜ አዋጁን ያረቀቁ ባለሙያዎች በአስረጅነት ተገኝተው ነበር፡፡ ባለሙያዎቹ ስለ አስቸኳይ ጊዜ አዋጁ ዝርዝር ገለጻ አድርገዋል፡፡

የኦሮሞ ፌደራሊስት ኮንግረስ ምክትል ሊቀመንበር አቶ ሙላቱ ገመቹ ጥሪ ደርሷቸው በስብሰባው ላይ ከተገኙ የተቃዋሚ ፓርቲ አመራሮች አንዱ ናቸው፡፡ በኮማንድ ፖስቱም ሆነ በተቃዋሚዎች በኩል በስብሰባው የተነሱ ጉዳዮች ምን እንደነበሩ እንዲህ ያስረዳሉ፡፡

“በእነርሱ በኩል ገለጻ የተደረገው ኮማንድ ፖስቱ እና የጊዜያዊ አዋጁ ለምን እንዳስፈለገ፣ ምን ጉዳዮች እንደነበሩ እና በአጠቃላይ አዋጁን ነው ገለጻ ያደረጉት፡፡ የተነሱት ጉዳዮች በጠቅላላው መንግስት የተጠየቀው የህዝብን ጥያቄ ራሱን በማደራጀት በሌላ በኩል ደግሞ ይህን ኮማንድ ፖስት ማቋቋሙ ምንድነው ጥቅሙ? ምን ያስገኛል? አሁን መንግስት ያቋቋመው በዘላቂነት ይህንን ችግር ይፈታዋል ወይ? የህዝብን ጥያቄ ይመልሳል ወይ? አግባብነቱ ምንድነው?” የሚሉ ጥያቄዎች መነሳታቸውን ይናገራሉ፡፡

“[በአዋጁ] ምክንያት የተነሳ ብዙ ሰው በየቦታው እየታሰረ ነው፡፡ ለታሰሩት ደግሞ አፋጣኝ የሆነ መልስ አልተሰጠም፡፡ በትክክል ወንጀለኞች ናቸው የተባሉት በሙሉ ፍርድ ቤት አልቀረቡም፡፡ በተለያዩ እስር ቤቶች ውስጥ ነው የሚገኙት እና ጠቀሜታው ምን ድረስ ነው? ለዘለቄታው ለዚህች ሀገር የሚጠቅመው እና ሰላምን ለማምጣት ምን ያህል አስተማማኝ ነው? የሚሉ እና የመሳሰሉት የመብት ጥያቄዎች ናቸው የተነሱት” ሲሉ የስብሰባውን መንፈስ ያስረዳሉ፡፡

“የአስቸኳይ ጊዜ ባይደነገግ ኖሮ በሀገሪቱ ውስጥ ትልቅ ብጥብጥ ይፈጠር እንደነበር እና መንግስትን እሰከማናጋት ሊደርስ እንደሚችል” ለጥያቄዎች በተሰጠ ምላሽ መገለጹን አቶ ሙላቱ ይናገራሉ፡፡ አዋጁ ባይታወጅ ኖሮ የተቃዋሚ ፓርቲዎች ህልውና ራሱ ጥያቄ ውስጥ ሊገባ ይችል እንደነበር ማብራሪያ መሰጡትንም ተናግረዋል፡፡

Äthiopien Anti-Regierungs-Protesten (REUTERS/T. Negeri)

“ሰላም አሰፍኗል” በሚል በኮማንድ ፖስቱ ተደጋግሞ የተሞካሸው የአስቸኳይ ጊዜ አዋጁ ተቃዋሚዎችን ጨምሮ በሁሉም ዘንድ ተቀባይነት እንዲኖረው ስብሰባውን የጠሩት መሞከራቸውን አቶ ሙላቱ ያስረዳሉ፡፡ ከዚህ በዘለለ ግን በውይይቱ በሁለቱም ወገኖች የተነሱት ጉዳዮች እልባት ሳይበጅላቸው ስብሰባው መጠናቀቁን ይገልጻሉ፡፡

“ሁለቱም [ወገን] ያለው የተገላቢጦሽ ነው፡፡ እያንዳንዱ የራሱን ሀሳብ ይዞ እንደወጣ ነው የተረዳሁት፡፡ እንድ መግባቢያ ወይም ነጥብ ላይ ደርሰን ይሄ ነው ብለን የወጣንበት ነገር የለም፡፡ ገለጻ ተደረገ፣ ጥያቄ ተጠየቀ፣ ይሄ ነው ተቀበሉት አይነት ነገር ነው እንጂ አዎንታዊ እና አሉታዊ ጎኑን ቁጭ ብለን ለማየት [አልቻልንም]፡፡ ለመጠየቅ ብዛትም ነበር፡፡ በዚያ ላይ ሁሉም ለጥያቄው መልስ ያገኘ አይመስለኝም” ይላሉ አቶ ሙላቱ፡፡

በስብሰባው በመቶዎች የሚቆጠሩ ተሳታፊዎች እንደነበሩ ቢነገርም የአዋጁን መደነገግ የተቃወሙ ግን ላለመገኘት ወስነው ቀርተዋል፡፡ በፓርቲ አመራሮች ዘንድ በተፈጠረ የመሪነት ውዝግብ ውስጥ የሚገኘው የሰማያዊ ፓርቲ በስብሰባው ላይ እንዲገኝ ተጋብዞ እንደነበር ደብዳቤውን የተቀበሉት አቶ ይልቃል ጌትነት ይናገራሉ፡፡ “በሰማያዊ ፓርቲ ሊቀመንበርነት በምርጫ ቦርድ ዘንድ የምታወቀው እኔ ነኝ፤ ከኮማንድ ፖስቱ ሴክሬተሪያትም ደብዳቤ ውሰዱ የሚል ጥሪ የደረሰው ለእኔ ነው” የሚሉት አቶ ይልቃል በስብሰባው ላለመገኘት መምረጣቸውን እና ምክንያታቸውን ያስረዳሉ፡፡

“በአጠቃላይ ይህ ነገር አስቸኳይ ጊዜ አዋጁ መታወጁን አንዳስፈላጊ ነገር አድርገው ባፈጻጸሙ ላይ ማብራሪያ የመስጠት አይነት ዝንባሌ ያለው መንፈስ ሆኖ ስላገኘሁት እኔ ደግሞ በመሰረቱ አሁን ኢትዮጵያ ካለችበት ሁኔታ አንጻር ስገመግመው አስቸኳይ ጊዜ አዋጅ የሚታወጀው በአንድ ሀገር ልዩ ጦርነት፣ ድርቅ፣ ረሃብ እና ከቁጥጥር ውጭ የሆኑ ነገሮች ሲፈጠሩ ነው፡፡ አሁን ኢትዮጵያ ውስጥ ያሉ አንዳንድ ነገሮች አልፎ አልፎ አንዳንድ ቦታዎች እንኳ ቢኖሩ ከአካባቢ ፖሊስ እና ከደንብ አስከባሪዎች ያለፈ ሀገርን አደጋ ላይ የሚጥል ምንም ዓይነት ነገር ስለሌለ የአስቸኳይ ጊዜ አዋጁ መታወጁ በራሱ ትክክል አይደለም፤ ተገቢ አይደለም ብዬ ስላማምን በጉዳዩ ላይ ማብራሪያ ለመቀበል መሄድ በጉዳዩ ላይ እንደማመን ስለሚቆጠር ስብሰባው ላይ አልተገኘሁም” ብለዋል፡፡

የኮማንድ ፖስቱ ሴክሬተሪያት ጽህፈት በስብሰባው ዙሪያ ማብራሪያ ለመስጠት ፍቃደኛ መሆኑን የገለጸ ቢሆንም የሚመለከተውን ለማነጋገር በተደጋጋሚ ብንደውልም ምላሽ የሚሰጠን ማግኘት አልቻልንም፡፡

ተስፋለም ወልደየስ  ኂሩት መለሰ   የጀርመን ሬዲዮ

ፋና በበኩሉ ከዚህ የሚከተለውን ዘገባ አስፍሯል ለማመጣጠኛ እንዲሆን እንዳለ አስፍረነዋል

የአስቸኳይ ጊዜ አዋጁ ህዝብን ለመምራት የሚያስችል ሰላምና መረጋጋት ያሰፈነ በመሆኑ ለፖለቲካ ፓርቲዎች ህልውና ዋስትና የሰጠ መሆኑን የኮማንድ ፖስቱ ሴክሬታሪያት አስታወቀ።

ሰላማዊ ትግልን ግብ አድርገው በኢትዮጵያ የሚንቀሳቀሱ የተቃዋሚ የፖለቲካ ፓርቲዎች፥ በአስቸኳይ ጊዜ አዋጁ ዙሪያ ከኮማንድ ፖስቱ ሴክሬታሪያት ጋር ዛሬ ተወያይተዋል።

ፓርቲዎቹ በሃገሪቱ አንዳንድ አካባቢዎች የተነሳውን ሁከት እና ብጥብጥ ተከትሎ ተግባራዊ በሆነው የአስቸኳይ ጊዜ አዋጅ ላይ ያላቸውን ጥያቄ እና ስጋታቸውን ማዕከል አድርገው ነው የመከሩት።

በመድረኩ ላይ የአስቸኳይ ጊዜ አዋጁ የተቃዋሚ ፓርቲዎች ህልውና ላይ ስጋትን የደቀነ ነው የሚሉ እና ሌሎችም ጥያቄዎች ቀርበዋል።

የኮማንድ ፖስቱ ሴክሬታሪያት የመከላከያ ሚኒስትሩ አቶ ሲራጅ ፈጌሳም፥ የአዋጁ ግብ የሃገሪቱን የቀደመ ሰላም መመለስ እንጂ የተቃዋሚ ፓርቲዎች ላይ ስጋትን መደቀን አይደለም ብለዋል።

በፈረሰ ሀገር ህዝብ መምራት አይቻልም ያሉት ሚኒስትሩ አዋጁ ለተቃዋሚ ፓርቲዎች ህልውና ዋስትና የሰጠ መሆኑንም ተናግረዋል።

ምንም የፖለቲካ እንቅስቃሴ እንዳናደርግ ታግደናል የሚሉት ተቃዋሚ ፓርቲዎቹም፥ አዋጁ የተለመደ የፓርቲ ስራዎችን እንዳናከናውን እንኳን ቦታ የነፈገ ነው የሚል ጥያቄ አንስተዋል።

የመድረክ ፓርቲ ምክትል ሊቀመንበር እና የህዝብ ግንኙነት ሃላፊው አቶ ገብሩ ገብረማርያም እንዳሉትም፥ ይህንን ሁኔታ ተከትሎ አንዳንድ ፓርቲዎች የፈቃድ ሰነዳችንን እንመለስ እስከማለት መድረሳቸውን ይናገራሉ።

ይሁንና የአስቸኳይ ጊዜ አዋጁ ከተለመደው የፓርቲ ስራ አንስቶ በኮማንድ ፖስቱ ፈቃድ አግኝተው ሊከናወኑ እስከሚችሉ ተግባራት ድረስ ያልተደረጉ ክልከላዎች ይዘት ተብራርቶልናል ነው ያሉት።

የኮማንድ ፖስቱ ሴክሬታሪያት አቶ ሲራጅ ፈጌሳ በበኩላቸው፥ በተቃዋሚ ፓርቲዎች የአስቸኳይ ጊዜ አዋጁን ሙሉ ይዘት በአግባብ ያለመረዳት ችግር መኖሩን ጠቅሰው ይህ ሁኔታም ፓርቲዎቹ ባነሷቸው ጥያቄዎች ላይ ተንጸባርቋል ይላሉ።

የመናገር መብታችን ታፍኗል፣ መግለጫ እንዳትሰጡ፣ አትሰብሳቡ ተብለናል የሚሉ ቅሬታዎች መቅረባቸውም የዚህ ማሳያ መሆኑን አስረድተዋል።

በአስቸኳይ ጊዜ አዋጁ የተከለከለ የህትመት ውጤት አለመኖሩን የጠቀሱት አቶ ሲራጅ፥ ሁከት ቀስቃሽ ቅስቀሳ እንጂ መቀስቀስ እንዳልተከለከለና ከአሸባሪ ድርጅት ሚዲያዎች ውጭም የታገደ ልሳንም ሆነ የታፈነ ሀሳብ እንደሌለም ገልጸዋል።

በቀጣይ ከምርጫ ጋር ተያይዞ ፓርቲዎች በሚያካሂዷቸው እንቅስቃሴዎች መንግስት ሁኔታዎችን እንደሚያመቻች እምነታቸው መሆኑን የገለጹት የአሮሞ ነጻነት ብሄራዊ ፓርቲ የህዝብ ግንኙነት ሃላፊ አቶ ክፍለማርያም ሙሉጌታ ደግሞ፥ የአስቸኳይ ጊዜ አዋጁ ሀገሪቱን ከብጥብጥ ወደ ስክነት የመለሰ ነው ብለዋል።

በአስቸኳይ ጊዜ አዋጁ አዋጁ ዙሪያ የተደረገው ውይይት ግልጽነትና መግባባት የፈጠረ መሆኑን የተናገሩት የኢትዮጵያ ራዕይ ፓርቲ ፕሬዚዳንት አቶ ተሻለ ሰብሮ፥ መሰል መድረኮች ተጠናክረው ሊቀጥሉ እንደሚገባ አንስተዋል።

አዋጁ የታለመለትን ግብ እየመታ ነው ያሉት አቶ ሲራጅም፥ በሃገሪቱ የታየውን ለውጥ ተከትሎ ገደቦች መነሳታቸውን ይጠቅሳሉ።

ከዚህ ባለፈ ግን ከተቃዋሚ ፓርቲዎች ጋር እንደዚህ አይነት ውይይት ማካሄድ፥ በፓርቲዎቹ እና በደጋፊዎቻቸው ላይ የተሻለ ግልጽነትን በመፍጠር የሃገሪቱን ሰላም እንደቀደመው ጊዜ አስተማማኝ ለማድረግ ፋይዳው ትልቅ መሆኑን ያስረዳሉ። ህዳር 21 ፣ 2009 (ኤፍ ቢ ሲ) ር ዕስ በዝግጅት ክፍሉ የተቀየረ

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: