Advertisements

ኢትዮጵያ የተዘረፈችው ታሪካዊ ቅርሶች እንዲመለሱላት የዓለም ማኅበረስብ ግፊት እንዲያደርግ ጠየቀች- ከ3500 በላይ ቅርሶችን ተዘርፋለች

https://www.youtube.com/watch?v=HN8BR8eBQAg

ኢትዮጵያ በውጭ ወራሪዎች ተዘርፈው የተወሰዱባት ታሪካዊ ቅርሶች እንዲመለሱላት የዓለም ማኅበረስብ ግፊት እንዲያደርግ ጠቅላይ ሚኒስትር ኃይለማርያም ደሳለኝ ጠየቁ። በአቡ ዳቢ ዓለም አቀፍ የታሪካዊ ቅርስ ጉባዔ የተካፈሉት ጠቅላይ ሚኒስትር ኃይለማሪያም እንዳሉት የተዘረፉ ቅርሶችን የማስመለስ ሂደቱ የዘገየ ነው።

ኢትዮጵያ የበርካታ ታሪካዊ ቅርሶች ባለቤት እንደመሆኗ መጠን በውጭ ወረራ ዘመን አሁን ደግሞ በሕገ-ወጥ የቅርስ አዘዋዋሪዎች ምክንያት የዘረፋው ሰለባ ሆናለች ብለዋል። በዚህም የበዙና ውድ የሆኑ ጥንታዊ ድርሳናትና ኃይማኖታዊ ቅርሶች እንዲሁም በቁፋሮ የተገኙ ቅሪቶች አገሪቷ ማጣቷን ገልጸዋል።ኢትዮጵያ ተዘርፈው የተወሰዱባት ታሪካዊ ቅርሶች እንዲመለሱላት የዓለም ማኅበረስብ ግፊት እንዲያደርግ ጠየቀች በሕገ-ወጥ መንገድ ከአገሪቱ ከተወሰዱት ጥንታዊ ድርሳናት መካከል ኃይማኖታዊ መጽሃፍት፣ የመድሃኒት፣ የሥነ-ክዋክብት፣ የቀን መቁጠሪያ፣ የፍልስፍና፣ የህግና የአስተዳድር መጽሃፍት በማሳያነት አንስተዋል። እንደ አውሮፓውያን አቆጣጠር በ 1868 እንግሊዛውያን ተጓዦችና በ 1936 የጣሊያን ወረራ ደግሞ የኢትዮጵያ ቅርሶች በብዛት የተዘረፉባቸው ዘመናት እንደሆኑ ጠቅላይ ሚኒስትሩ ተናግረዋል።

በአሁነ ጊዜ ከ 3 ሺህ 500 በላይ ታሪካዊ ድርሳናት በአውሮፓ አገራትና በአሜሪካ እንደሚገኙ ይታመናል ብለዋል። የቅርስ ዘረፋና ሕገ-ወጥ ዝውውር እንደ ኢትዮጵያ ላሉ ታዳጊ አገራት ችግር መሆኑንም ጠቅላይ ሚኒስትር ኃይለማርያም ገልጸዋል። ከዚህ በላይ የከፋ አደጋ የሚሆነው ግን ባህልን የማጥፋት አካል የሆነው ቅርሶችን ሆን ተብሎ የማውደም የአሸባሪዎች ተግባር ነው ብለዋል።

የዓለምን ባህል ለማጥፋት ሆን ተብሎ የሚፈጸመው ድርጊት ኢትዮጵያን እንደሚያሳስባት ነው የተናገሩት። እንደ እሥላማዊ መንግሥትና አል ቃይዳ ያሉ አሸባሪ ቡድኖች ኅብረተሰቡ ባህልና ወጉ እንዲተው በማስገደድ ባህልን የማጥፋት ድርጊት እንደሚፈጽሙ ጠቅሰዋል። በሶሪያ፣ በኢራቅና በአፍጋኒስታን የተፈጸመው ጥንታዊ ቅርሶችን የማጥፋት ድርጊት የዚሁ ማሳያ ተደርጎ የሚወሰድ ነው ብለዋል። ታሪካዊ ቅርሶችን ከሕገ-ወጥ አዘዋዋሪዎች፣ ከታጣቁ ኃይሎችና ከአሸባሪዎች ጥቃት ለመከላከል የጋራ ትብብር እንደሚያስፈልግ ጠቅላይ ሚኒስትሩ ገልጸዋል።

በአቡ ዳቢ የተካሄደው ዓለም አቀፍ የታሪካዊ ቅርሶች ጥበቃ ጉባዔ በቅርሶች ላይ የሚፈጸመውን ጥቃት ለማስቆም የጋራ ትብብር ማጠናከር በሚቻልባቸው ጉዳዮች ዙሪያ የመከረ ነው። ጉባዔው ሲጠናቀቅም የተባበሩት መንግሥታት የትምህርት፣ የሳይንስና የባህል ድርጅ (ዩኔስኮ) በወታደራዊ ግጭቶች ወቅት ቅርሶችን ከጥቃት እንዲከላከል የሚደግፍ የአቡ ዳቢ ውሳኔ ያስተላልፋል ተብሎ ይጠበቃል።

ምንጭ፦  ህዳር 24፣ 2009 (ኤፍ.ቢ.ሲ)

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: