Advertisements
Fri. Sep 21st, 2018

የገቢዎችና ጉምሩክ የቀድሞ ከፍተኛ ኃላፊዎችና ታዋቂ ነጋዴዎች ተከላከሉ ተባሉ

  • አርሶ አደሯ ተጠርጣሪ በነፃ ተሰናበቱ

የቀድሞ የኢትዮጵያ ገቢዎችና ጉምሩክ ባለሥልጣን ዋና ዳይሬክተርና ምክትል ዋና ዳይሬክተርን ጨምሮ፣ ስድስት ከፍተኛ ኃላፊዎችና ታዋቂ ነጋዴዎች በመዝገብ ቁጥር 141356 በቀረቡባቸው ከባድ የሙስና ወንጀል ክሶች እንዲከላከሉ፣ ሰኞ የካቲት 13 ቀን 2009 ዓ.ም. የፌዴራል ከፍተኛ ፍርድ ቤት ልደታ ምድብ 15ኛ ወንጀል ችሎት ብይን ሰጠ፡፡

የፌዴራል ዓቃቤ ሕግ በጥቅምት ወር 2006 ዓ.ም. የመሠረተውን ክስ ሲመረምር ከርሞ በመዝገቡ ላይ ብይን ለመስጠት ተደጋጋሚ ቀጠሮዎችን የሰጠ ቢሆንም፣ የካቲት 13 ቀን 2009 ዓ.ም. ብይን ሲሰጥ ነዋሪነታቸው በኦሮሚያ ክልል ምሥራቅ ሸዋ ዞን በአዳሚ ቱሉ የሆኑት የ59 ዓመቷ አርሶ አደር ወይዘሮ ሽቱ ነጋሽ ኢዶ፣ ከተከሰሱበት የሙስና ወንጀል መከላከል ሳያስፈልጋቸው በነፃ እንዲሰናበቱ አስታውቋል፡፡

ወይዘሮ ሽቱ የተጠረጠሩበት የሙስና ወንጀል በገቢዎችና ጉምሩክ ባለሥልጣን አዳማ ቅርንጫፍ የፍተሻ ክፍል ኃላፊ የነበሩት የእንጀራ ልጃቸው አቶ ያለው ቡላ፣ በሕገወጥ መንገድ ያገኙትን ንብረትና ገንዘብ በመሰወር፣ በሥራ ላይ በማዋልና ሕጋዊ አስመስለው በማዋል ተጠርጥረው ነበር፡፡ ነገር ግን ከሳሽ ዓቃቤ ሕግ እንደ ክሱ የሚያስረዱለት ምስክሮችም ሆነ የሰነድ ማረጋገጫ ሊያቀርብባቸው ባለመቻሉ በነፃ ተሰናብተዋል፡፡ ወይዘሮ ሽቱ በተጠረጠሩበት ወንጀል ከሦስት ዓመታት በላይ በማረሚያ ቤት ቆይተዋል፡፡

ሌሎቹ ተከሳሾች አቶ መላኩ ፈንታ፣ አቶ ገብረ ዋህድ ወልደ ጊዮርጊስ፣ አቶ አሞኘ ታገለ፣ አቶ ተመስገን ጉላል፣ አቶ እሸቱ ግረፍ፣ አቶ ያለው ቡላ (ሁሉም የባለሥልጣኑ መሥሪያ ቤት ከፍተኛ ኃላፊዎች የነበሩ ናቸው)፣ ታዋቂ ነጋዴዎቹ ደግሞ አቶ ነጋ ገብረ እግዚአብሔር፣ አቶ ከተማ ከበደ፣ አቶ ጌቱ ገለቴ (በሌሉበት) እና አቶ ገብረ ሥላሴ ገብሬ ናቸው፡፡

ሁሉም ተከሳሾች ተከላከሉ ሲባሉ ከቀረቡባቸው ስድስት ክሶች መካከል አቶ መላኩ ፈንታ በአንደኛ ክስ ብቻ በወንጀል ሕግ አንቀጽ 411 (1ሐ) መሠረት እንዲከላከሉ ተብለዋል፡፡ ሌሎቹ ተከሳሾች ዓቃቤ ሕግ ያቀረበባቸውን የሰውና የሰነድ ምስክሮች ማስተባበል ባለመቻላቸው፣ በወንጀል ሕግ አንቀጽ 411 (1ሐ) እና (2) መሠረት እንዲከላከሉ ፍርድ ቤቱ ብይን ሰጥቷል፡፡ ፍርድ ቤቱ ብይኑን የሰጠው በሁሉም ተከሳሾች ላይ ነው፡፡ ኃላፊዎቹ ከነጋዴዎችና አስመጪዎች ጋር በመመሳጠር ከጂቡቲ ወደብ ወደ ሚሌ የተጓጓዙ የንግድ ዕቃዎች፣ ከሚሌ እስከ መዳረሻ የፍተሻ ጣቢያ ድረስ ሳይፈተሹ እንዲያልፉ መመርያ መስጠታቸውን ዓቃቤ ሕግ በምስክሮቹ ማስረዳት መቻሉን አስታውቋል፡፡

በሁለተኛ ክስ አቶ አሞኘና አቶ ተመስገን (የባለሥልጣኑ ኃላፊዎች የነበሩ)፣ አንድ ነጋዴ የሕፃናት ጫማዎች ለማስመጣት ‹ዲክለር› አስደርጎ የአዋቂ ጫማ ማስመጣቱ በፈታሾች የታወቀ ቢሆንም፣ ተከሳሾቹ ከአስመጪዎቹ ጋር በጥቅም በመመሳጠር ያለምንም ዕርምጃ እንዲያልፍ በማድረግ ሥልጣናቸውን አላግባብ መገልገላቸውን ተጠቅመዋል በማለት ዓቃቤ ሕግ ክስ አቅርቦባቸው ነበር፡፡ ፍርድ ቤቱ መዝገቡን ሲመረምር ዓቃቤ ሕግ እንደ ክሱ ሊያስረዳባቸው አለመቻሉን በማረጋገጡ፣ መከላከል ሳያስፈልጋቸው ሁለቱም በነፃ እንዲሰናበቱ ብይን ሰጥቷል፡፡

በሦስተኛ ክስ አቶ ያለው ቡላ 10,000 ብር ጉቦ መቀበላቸው ስለተመሰከረባቸው፣ የተጠቀሰባቸው የወንጀል ሕግ አንቀጽ 411(1ሐ) እና (2) ወደ ወንጀል ሕግ አንቀጽ 411(1ሐ) ተቀይሮ እንዲከላከሉ ተብለዋል፡፡ ሌሎቹ ተከሳሾች የተመሠረተባቸውን ክስ በወንጀል ሕግ አንቀጽ 411(1ሐ) እና (2) መሠረት እንዲከላከሉ ብይን ተሰጥቷል፡፡ የመከላከያ ዝርዝራቸውንም የካቲት 20 ቀን 2009 ዓ.ም. እንዲያቀርቡ ትዕዛዝ ተሰጥቷል፡፡

ሪፖርተር – ታምሩ ጽጌ

Advertisements

Leave a Reply

This site uses Akismet to reduce spam. Learn how your comment data is processed.

You may missed

%d bloggers like this: