ጉደኛ ስንኞች – እንኳን ለአለም መሃኖች ቀን አደረሰን!!

beweqetuእንኳን ለአለም መሃኖች ቀን አደረሰን
እንዲህ የሚባል ቀን እንደሌለ አውቃለሁ::
ግን እስከመቸ ሌሎች የደነገጉትን ቀን ብቻ ሳከብር እኖራለሁ ?!
እኔም ቀን ልደንግግ እንጂ
በድሮ ጊዜ ልጅ መውለድ የሴት ዋና ተግባር ተደርጎ ይወሰድ ነበር:: ያኔ ዘጠና ሚሊዮን ገና አልሞላንም :: የተወለደው ሁሉ አይበረክትም:: ከፈንጣጣ መቅሰፍት ቢያመልጥ ርሃብ ይገለዋል። ወይ እበላ ሲል ሰይፍ ይበላዋል:: ያኔ ልጅ ማለት የርስት ወራሽ ነው:: ቦዲጋርድ ነው:: ከብልት በስተቀር ሌላ ቋሚ ንብረት ለሌለው ምስኪን ወንድ ተስፋ ነው:: ባገራችን፣ ተስፋየ የሚለው ስም መብዛቱ ይህን ያሳያል::
ወላድ የዚህ ሁሉ በረከት አምጭ ሆና ስለምትቆጠር ትወደሳለች:: “ወላድ በድባብ ትሂድ “የሚባለው ምርቃት ጥልቅ ትርጉም ነበረው:: ድባብ ግዙፍ ቀይ ጃንጥላ ሲሆን ትልልቅ ማእረግ ያላቸው ሰዎች ብቻ የሚይዙት ነበር::
ባንፃሩ ፤ መካን ሴት ወዮላት ! ልጅ ማምረት አለመቻልዋ በስንፍና ያመጣችው ይመስል ፣ንቀትን ትጠግባለች:: “በቅሎ” ተብላ ባሽሙር ትሰደባለች:: ባሉዋ ይፈታታል:: ባይፈታት እንኳ ሽለ-ሙቅ ሴት ፈልጎ ይደርብባታል::
የድሜዋን ብዙ ክፍል ፣ ፈውስ ፍለጋ ትባዝናለች:: በየጠበሉ በየአዋቂው ቤት እየተንከራተተች ጉልበቷንና ጥሪቷን ትበትናለች:: አንድ ንፍጣም የመንደር ሀኪም የስርና የቅጠል መሞከርያ ያደርጋታል::
“ለእናትነት የምናዘንበው ቅጥ ያጣ ውዳሴ ከላይ ከላይ ሲታይ ፣ሴትን ማክበር ይመስላል:: ግን በደንብ ስትፈትሸው እልም ያለ መድልኦ ነው:: ሴቶች በማህፀናቸው ሀሳብ ብቻ ተጠምደው ፣የአእምሮ ፍሬ እንዳያበረክቱ ማዘናጊያ ነው:: “ይላል ወዳጄ ምኡዝ። እውነቱን ነው? ወይስ እብደቱን ነው?
ሮዛ ፓርክስ ፣ አዝማሪት ጣዲቄ ፣ እቴጌ ጣይቱ የተለየ ሀሳብ ያፈለቁት ለዚህ ይሆን? ምናልባት፤ የለመድነው በር እስኪዘጋ ድረስ ሌላ በር መኖሩን አናጤንም::
የጎጃሙ ጌታ ራስ ሃይሉ፣ ባንድ ወቅት የመካን ሴቶችን ንብረት መውረስ የሚያስችለው ግፈኛ አዋጅ አውጥቶ ነበር ይባላል:: ወላዶች ፣”እንኳን ከዚህ ሰወርከን “አሉ:: መካኖችም የመጣውን አሜን ብለው ተቀበሉ::
አንዲት ሴት ግን አልተበገረችም:: ራስን እየተከተለች ግፈኛውን አዋጅ እንዲያፈርስ መወትወት ጀመረች::
አንድ ቀን ራስ በበቅሎው ሴትዮዋ በግር ሲሄዱ አንድ ምስኪን ገበሬ ሲያርስ አዩ:: ገበሬው፣ አንዲት መሲና ላምና አንድ በሬ ጠምዶ ያርሳል::
ሴትዮዋ ይህንን ስታይ፣ ቀልጠፍ ብላ እንዲህ ገጠመች፤
” እዩ ተመልከቱ የመካንን ጉድ
ጠምደው አረሱባት፤ እንደኔ ባትወልድ”
ራስ ሃይሉ ፣ ግፈኛ ጌታ ቢሆንም ግጥም የማይዘልቀው (ግጥም -ከላ) ሰውነት አልነበረውም:: በሴትዮዋ ሀሳብ ልቡ ተነክቶ ላሚቱን ከቀንበሩ አስፈታት:: በማግስቱም ግፈኛውን አዋጅ ሻረው::
አሪፍ ሀሳብ ድንጋይ ልብ ያቀልጣል:: እናም፣ ዘጠኝ ወር የሚያረግዙ ሴቶችን ስናወድስ፣ በዘጠኝ ሰከንድ የለውጥ ሞተር የሚሆን ሀሳብ የሚያፈልቁ ሴቶችንም አንርሳ::

በእውቀቱ ስዩም ከፌስ ቡክ ገጹ የተወሰደ

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s