Advertisements

የአቶ በቀለ ገርባ የይግባኝ መከራከሪያ ተደመጠ

Image may contain: one or more people and people standing

የኦሮሞ ፌደራሊስት ኮንግረስ ፓርቲ ምክትል ሊቀ መንበር የሆኑት አቶ በቀለ ገርባ፣ የይግባኝ መከራከሪያቸውን አቀረቡ፡፡ ከፍተኛው ፍርድ ቤት ከዚህ ቀደም አቶ በቀለ ገርባ ያቀረቡትን የዋስትና ጥያቄ ውድቅ አድርጎ የነበረ ሲሆን፣ እሳቸውም የፍርድ ቤቱን ውሳኔ በመቃወም ይግባኝ ጠይቀዋል፡፡ አቶ በቀለ ገርባ ከዚህ ቀደም የተከሰሱት በሽብር ወንጀል ሲሆን፣ ክሱ ወደመደበኛው የወንጀል ድርጊት መቀየሩን ተከትሎ የዋስትና መብታቸው ተከብሮ በውጭ ሆነው እንዲከራከሩ ጠይቀው ነበር፡፡
ትላንት ጥቅምት 9 ቀን 2010 ጠቅላይ ፍርድ ቤት የቀረቡት አቶ በቀለ ገርባ፣ የተጠቀሰባቸው የወንጀል ዓይነት ዋስትና የማያስከለክል እንደሆነ ተናግረዋል፡፡ ከፍተኛው ፍርድ ቤት ዋስትና እንደከለከላቸው በመግለጽም፣ ጠቅላይ ፍርድ ቤት ውሳኔውን ሽሮ የዋስትና መብታቸውን እንዲያከብር ጠይቀዋል፡፡ ዓቃቤ ህግ አቶ በቀለ በዋስ ቢፈቱ ከሀገር ሊሸሹ ይችላሉ፣ ፍርድ ቤት ላይቀርቡ ይችላሉ የሚሉና ሌሎች ሰበቦችን በመደርደር ፍርድ ቤቱ የዋስትና መብታቸውን እንዳያከብር ተከራክሯል፡፡ የተከሳሽ ጠበቃ የሆኑት አቶ አመሃ መኮንን፣ ደንበኛው የተጠቀሰባቸው የወንጀል ዓይነት በፍጹም ዋስትና የማያስከለክል እንደሆነ በመግለጽ፣ ፍርድ ቤቱ ደንበኛቸውን በዋስ እንዲለቅ ጠይቀዋል፡፡
ከፍተኛው ፍርድ ቤት ልደታ ምድብ አራተኛ ወንጀል ችሎት አቶ በቀለ ገርባ ከዚህ ቀደም ያቀረቡትን የዋስትና ጥያቄ ውድቅ በማድረጉ፣ ከጠበቃቸው ጋር በመማከር ጉዳዩን ወደ ጠቅላይ ፍርድ ቤት ይዘውት ሔደዋል፡፡ በተከሳሽ ጠበቃ እና በዓቃቤ ህግ መካከል ያለውን የዋስትና መብት የተመለከተ ክርክር ብይን ለመስጠት ለጥቅምት 20 ቀን 2010 ተለዋጭ ቀጠሮ ተሰጥቷል፡፡ አቶ በቀለ ገርባ በእነ ደጀኔ ጣፋ የክስ መዝገብ ከተከሰሱ የኦፌኮ ከፍተኛ አመራሮች መካከል አንዱ እንደሆኑ ይታወቃል፡፡ የኦፌኮ አመራሮች ከሊቀ መንበሩ ዶ/ር መረራ ጉዲና ጀምሮ በጠቅላላው እስር ቤት እንደሚገኙ ይታወቃል፡፡

BBN news 

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: