በጉራፈርዳ 55 ሰዎች መግደላቸው የተረጋገጠባቸው ተከሳሾች የዕድሜ ልክ ጽኑ እስራት ተወሰነባቸው

በደቡብ ክልል በቤንቺ ማጂ ዞን በጉራፈርዳ ወረዳ መለያ፣ ኮመታ፣ ጋቢቃ፣ ኩኪ፣ ኡይቃ፣ ቢቢታ፣ ስመርታና ከነዓን ቀበሌዎች በሚኖሩ የአማራ ብሔር ተወላጆችና በፌዴራል ፖሊሶች ላይ በድምሩ የ55 ሰዎችን ሕይወት ማጥፋታቸው የተረጋገጠባቸው 18 ተከሳሾች፣ በዕድሜ ልክና ከሦስት ዓመታት ከሦስት ወራት እስከ 22 ዓመታት በሚደርስ ጽኑ እስራት እንዲቀጡ ውሳኔ ተሰጠ፡፡

በክልሉ ቤንቺማጂ ዞን ጉራፈርዳ ወረዳ ፖሊስ አዛዥ፣ የፀጥታ ኃላፊ፣ ዋና አስተዳዳሪ፣ የግብርና ጽሕፈት ቤት ኃላፊ፣ የቱሪዝምና ኮሙዩኒኬሽን ኃላፊና በሌሎች ኃላፊነት ላይ የነበሩ አሁን ወንጀለኛ መሆናቸው በፍርድ ቤት የተረጋገጠባቸው ግለሰቦች፣ ከመስከረም 25 ቀን እስከ ጥቅምት ወር መጨረሻ 2007 ዓ.ም. ድረስ በቀበሌዎቹ ለበርካታ ዓመታት በሕጋዊ መንገድ ሰፍረው ይኖሩ የነበሩ የሌላ አካባቢ ተወላጆች (አማሮች) ላይ ጥቃቱን መፈጸማቸውን፣ የፌዴራል ከፍተኛ ፍርድ ቤት ልደታ ምድብ 19ኛ ወንጀል ችሎት ያለፈው ውሳኔ ይገልጻል፡፡

ፍርደኞቹ ወሩ ተለይቶ በማይታወቅበት በ2004 ዓ.ም. ‹‹ሰባት ቁጥር መንደር›› ተብሎ በሚጠራው አካባቢ የጉራፈርዳ ወረዳ ነዋሪዎችን በመሰብሰብ፣ ‹‹ይህ ቦታ የደቡብ ክልል በመሆኑ ይዛችሁ የመጣችሁትን ፌስታል ይዛችሁ አገራችንን ለቃችሁ ውጡ፡፡ የማትወጡ ከሆነ ሌላ ኃይል ማደራጀት ሳያስፈልግ በራሳችን ኃይል እናስወጣችኋለን፤›› በማለት ኅብረተሰቡ ወደ ብጥብጥ እንዲገባ ማድረጋቸውን፣ ከሳሽ ዓቃቤ ሕግ በሰነድና በሰዎች ምስክሮች ማረጋገጡን ውሳኔው ያብራራል፡፡

ፍርደኞቹ አንደኛው ወገን በሌላኛው ወገን ላይ እንዲነሳ በማድረግና የተነሳውን የእርስ በርስ ጦርነት ለማስቆም ወደ ሥፍራው በመሄድ ላይ የነበሩ የፌዴራል ፖሊሶች አካባቢውን እንደማያውቁት እያወቁና እየመሩ ሽፍቶች ወደመሸጉበት ‹‹ጋቢቃ›› የሚባል ጫካ በመውሰድ፣ ሞትና የአካል ጉዳት እንዲደርስባቸው ማድረጋቸውም በውሳኔው ሰፍሯል፡፡

በወረዳው የኩኪ ሚሊሻ ነው የተባለው አንደኛ ተከሳሽ ፃዲቅ የራ ዘይሳ፣ አርሶ አደሮቹ ካብትኔ ጎራና ጋጉ ጫዳ፣ የሸኮ ብሔረሰብ አባላትንና የተወሰኑ የማዣንግና የአኝዋ ብሔረሰብ አባላትን የጦር መሣሪያ ገዝተው በማስታጠቅና ሥልጠና በመስጠት ከሌሎች አካባቢዎች በሕጋዊ መንገድ ወደ ክልሉ መጥተው በሰፈሩ ዜጎች ላይ የሞት፣ ከባድ የአካል ጉዳትና በሚሊዮን የሚቆጠር የንብረት ላይ ጉዳት ማድረሳቸው በምስክሮችና በሰነድ ማስረጃ መረጋገጡን ፍርድ ቤቱ በውሳኔው ገልጿል፡፡ በአጠቃላይ ፍርደኞቹ ግጭቱን ለማረጋጋት በአካባቢው በተሰማሩ የፌዴራል ፖሊስ አባላት፣ የክልሉ ፖሊሶችና በመከላከያ ሠራዊት አባላትና በአካባቢው ነዋሪዎች ላይ የእርስ በርስ ጦርነት በማስነሳት፣ የ55 ሰዎች ሕይወት ማጥፋታቸው መረጋገጡን ውሳኔው ያስረዳል፡፡ በሰባት ሰዎች ላይ ከባድና ቀላይ የአካል ጉዳት መድረሱም ተገልጿል፡፡

በአጠቃላይ ፍርደኞቹ 998,049 ብር ግምት ያላቸው የቆርቆሮ ቤቶች ማቃጠላቸውን፣ 9,857,580 ብር ግምት ያላቸው 23,272 እንስሳትን መውሰዳቸውን፣ 16,050,682 ብር ግምት ያላቸው 19,390 ኩንታል የተለያዩ ሰብሎች፣ 896,645 ብር ግምት ያላቸው በማሳ ላይ ያሉ ሰብሎችን፣ በድምሩ 27,803,256 ብር ግምት ያለው ንብረትና ሰብል ማውደማቸውን ውሳኔው ያብራራል፡፡

ፃዲቅ የራ ዘይሳ፣ አቶ ያዕቆብ ፎርጮና አቶ ጋጉ ጫዳ የተባሉት ተከሳሾች በዕድሜ ልክ ጽኑ እስራት፣ አቶ ካብትኔ ጎራ ደርሳ በ22 ዓመታት፣ አቶ ከበደ ካቺዋና ረዳት ኢንስፔክተር ምስክር ፋጅዋ በ19 ዓመታት ጽኑ እስራትና ሌሎች ዘጠኝ ተከሳሾች ደግሞ ለሦስት ዓመታት ከሦስት ወራት እስከ 13 ዓመታት በሚደርስ ጽኑ እስራት እንዲቀጡ ውሳኔ ተሰጥቷል፡፡

ታምሩ ጽጌ – reporter amharic

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s