Advertisements

ሲራጅ ፈርጌሳ እስካሁም መንገድ ዝግ መሆኑንና በጸጥታ ሃይሎች ላይ ጉዳት ማጋጠሙን ገለጹ፣ በህዝብ ወገን የደረሰውን ሞትና ጉዳት አላነሱም

የወታደራዊ ኮማንድ ፖስት ሰከሬታሪያት አቶ ሲራጅ ፈርጌሳ ስም በመዘርዘር የትራንስፖርት ስምሪት ሙሉ በሙሉ መዘጋቱን አስታወቁ። ከጸጥታ ሃይሎች አስራ ሰባቱ ላይ ጉዳት መደረሱን አመለክቱ። ከህዝብ ወገን ስለደረሰው ሰብአዊ ቀውስ ያሉት ነገር የለም። ጥፋተኛ የተባሉት በቁጥጥር ስር እየዋሉ መሆናቸውን አመልክተዋል።

አድማውን ከቀለም አብዮት ጋር ያያዙት አቶ ሲራጅ፣ እንቅስቃሴው የውጭ እጅ ያለበትና ስልጣን የሚጠይቅ መሆንን አመልክተዋል። ጥያቄው “ኢህአዴግን በቃህ” የሚል መሆኑ በተደጋጋሚ እየተገለጸና በግልጽ ላለፉት ሁለት ዓመታት የከረረ ትግል የሚደረገው ለዚሁ መሆኑንን ዓለም እያወቀው እሳቸው ይህንን ማለታቸው አስገራሚ ሆኗል።

የአስቸኳይ ጊዜ አዋጁ ከመታወጁና ከታወጀ በሁዋላ የተገደሉ ስለምኖራቸው በውጪ አካልት፣ በተለያዩ የውጪና የአገር ውስጥ ሚዲያዎች በድምጽና በምስል ማቅረባቸው የአቶ ሲራጅን መግለጫ ጎዶሎ አድርጎታል። በመንግስትም ሆነ በሴክሬታርያቱ በኩል መረጃ ለማግኘትና መረጃዎችን አመጣጥኖ ለማስተላለፍ ችግር መኖሩን የተለያዩ ሚዲያዎች ሲገልጹ በመቆየታቸው አቶ ሲራጅ ይህንን ያካከተተ መግለጫ ሊሰጡ ይገባ እንደነበር ታዛቢዎች ተናግረዋል።

ፋና ይህንን ዘግቧል- 

በሀገሪቱ አንዳንድ አካባቢዎች የተፈጠረው አለመረጋጋት የቀለም አብዮት መልክ እየያዘና በግልጽ ስልጣን የመፈለግ አዝማሚያ እየታየበት መሆኑን የአስቸኳይ ጊዜ አዋጅ ኮማንድ ፖስት ገለጸ።

ሁኔታው ተቀባይነት የሌለውና መቼም ቢሆን በነውጥ፣ በአቋራጭና በውጭ ሃይሎች ተፅዕኖ የሚለወጥ መንግስት እንደማይኖር ነው የኢፌዴሪ መከላከያ ሚኒስትር እና የኮማንድ ፖስቱ ሴክሬታሪያት አቶ ሲራጅ ፈጌሳ የተናገሩት።

እነዚህ የቀለም አብዮት አራማጆች ተከታታይ ሁከቶችን በመጥራት እና በማስተባበር መንግስት ላመናቸው ትክክለኛ የህብረተሰብ ጥያቄዎች ምላሽ እንዳይሰጥ እና በመንግስት እና በህብረተሰቡ መካከል መቃቃር ለመፍጠር እየሞከሩ መሆኑን ነው አቶ ሲራጅ የገለፁት።

አቶ ሲራጅ ያለፉት ቀናትን የፀጥታ ሁኔታ ሲያብራሩም ከአስቸኳይ ጊዜ አዋጁ መታወጅ በኋላ የፀጥታ አካላትን ጨምሮ በተቋማትና ፋብሪካዎች ላይ ጥቃት መፈጸሙንም አንስተዋል።

በዚህም እስካሁን 17 የፀጥታ አካላት ላይ ጉዳት ደርሷል፥ ከፀጥታ አካላቱ ላይ የመሳሪያ ነጠቃ መፈጸሙንም አብራርተዋል።

በአራት ተሽከርካሪዎች ላይ ቃጠሎና 10 ተሽከርካሪዎች ተጎድተዋል ያሉት አቶ ሲራጅ፥ በተለያዩ አካባቢዎች የሚገኙ የቀበሌ ፅህፈት ቤቶች መቃጠላቸውንም ጠቅሰዋል።

ኮማንድ ፖስቱም በዚህ ተግባር ላይ ተሳትፈዋል የተባሉ ዋና ዋና ተጠርጣሪዎችን በቁጥጥር ስር የማዋል ስራ እያከናወነ መሆኑንም ነው ያስረዱት።

ከአስቸኳይ ጊዜ አዋጁ መታወጅ በኋላም የትራንስፖርት አገልግሎት መቋረጡን ጠቅሰው፥ ከአዲስ አበባ-አምቦ-ነቀምት-አሶሳ መንገድ እስካሁን የትራንስፖርት አገልግሎት አለመጀመሩን ጠቁመዋል።

በተጨማሪም ከአዲስ አበባ -ወሊሶ – ጅማ መስመር ትራንስፖርት መቋረጡንም ገልፀዋል፤ በእነዚህ አካባቢዎች በቂ የፀጥታ ሃይል መመደቡን በመጥቀስ ሁኔታውን ወደ መደበኛ እንቅስቃሴ ለመመለስ እየተሰራ ነው ብለዋል።

በምዕራብ ወለጋ፣ ጅማ፣ ደምቢዶሎና ነቀምት አካባቢዎች የንግድ ቤቶች በሚደርስባቸው ዛቻና ማስፈራሪያ መዘጋታቸውንም አስታውቀዋል።

ከአዋጁ መታወጅ በኋላ በአንዳንድ አካባቢዎች ያለውን ሁኔታ እልባት ለመስጠትም ተጠርጣሪዎችን በቁጥጥር ስር የማዋል ስራ ተጠናክሮ ይቀጥላልም ነው ያሉት።

ህብረተሰቡም ለኮማንድ ፖስቱ አስፈላጊውን ትብብር እንዲያደርግ ኮማንድ ፖስቱ ጥሪ አቅርቧል።

ኮማንድ ፖስቱ ህብረተሰቡ 012- 552-70 03 እና 012- 551- 14 29 የስልክ መስመሮች በመደወል አስፈላጊውን ጥቆማ መስጠት ይችላል ነው ያለው።

Advertisements

Leave a Reply

This site uses Akismet to reduce spam. Learn how your comment data is processed.

You may missed

%d bloggers like this: