Advertisements

የአስቸኳይ አዋጁ በኢህአዴግ ስራ አስፈሳሚ በሙሉ ድምጽ እንዳልተወሰነ ሽፈራው ሽጉጤ አመኑ

የኢህአዴግ ጽህፈት ቤት ሃላፊና የደህዴን አዲሱ ሊቀመንበር አቶ ሽፈራው ሽጉጤ የታወጀው የአስቸኳ ጊዜ አዋጅ በኢህአዴግ ስራ አስፈጻሚ ሙሉ ድምጽ አለመወሰኑንን አመለከቱ። ውሳኔው ” በተባበረ” ድምጽ እንደተወሰነ ይፋ አድርገዋል። ይሁን እንጂ ዝርዝር ጉዳዩን አላብራሩም። 

ቀደም ሲል በተባረርሪና በአንዳንድ የመገናኛ ዘዴዎች፣ በተለይም በኦሮሚያ ሚዲያ ኔት ወርክ ውሳኔው በሙሉ ድምጽ የስራ አስፈጻሚውን ውሳኔ እንዳላገኘ ሲገልጹ ነበር። በወቅቱ ምንም ዓይነት ማስተባበያ አልተሰጠም። ዛሬ አቶ ሽጉጤ በሰጡት ጋዜጣዊ መግለጫ ላይ ውሳኔው የተወሰነው ” በተባበረ” ድምጽ መሆኑንን አረጋግጠዋል።

በቅርቡ ሰማንያ ስምንት የኦሮሚያ ክልል የፓርላማ ወኪሎች ለአዋጁ ድምጽ የነፈጉ መሆኑ፣ የኦህዴድ ሊቀመንበር ዶክተር አብይ አህመድ በስብሰባው ባለመገኘት በይፋ ተቃውሟቸውን ማስመዝገባቸው አይዘነጋም። በዚሁ መነሻ መሰረት አሁን አቶ ሽፈራው ” በተባበረ” ድምጽ አዋጁ እንዲታወጅ ስምምነት መደረሱን መናገራቸው ቀደም ሲል ለተሰሙት ዜናዎች እውቅና እንደመስጠት ሆኖ ተወስዷል።

በድርጅታዊ እንቅሳቃሴዎች ዙሪያ እንደሚመከር የተነገረለት የኢህአዴግ ስራ አስፈጻሚ እሁድ ስብሰባ እንደሚቀመጥ ነው ተጠቆመ። በድምጽ ሳይወሰን የድርጅቱ ጉባኤ እስከ ነሃሴ እንደሚራዘም ተጠቆመ። በነሓሴ የአስቸኳይ ጊዜ አዋጁ ከተጠናቀቀ በሁዋላ የድርጅታዊ ጉባኤው መካሄድ ጫናን ለመቀነስ እንደሆነ ተገምቷል።

የድርጅቱ የጽህፈት ቤት ሃላፊ አቶ ሽፈራው ሽጉጤን ጠቅሰው የኢህአዴግ መገናኛዎች እንዳሉት በስብሰባው ” ከጥልቅ ግምገማው” በሁዋላ ያሉት አፈጻጸሞች ይዳሰሳሉ። የድርጅቶች አሰራርም ይፈተሻል። 

የድርጅቱ ጉባኤ ቢይንስ በሁለት ዓመት፣ ቢበዛ በሁለት ዓመት ጊዜ ውስጥ እንዲካሄድ ደንቡ ቢደነግግም በአገሪቱ ባለው የፓለቲካ ቀውስ ሳቢያ አለመካሄዱን አቶ ሽፈራው አመልክተዋል። ይህም የሆነው በስራ አስፈጻሚው ውሳኔ መሆኑን ተናግረዋል። አሁንም ቢሆን አገሪቱ በአስቸኳይ አዋጅ ስር በመሆኗና ባለው ቀውስ ሳቢያ የድርጅቱ ጉባኤ እንደሚራዘም ከወዲሁ አሳውቀዋል። እንደተለመደው ግን ስራ አስፈጻሚው ውሳኔ እንደሚሰጥበት አመልክተዋል። ፋና ይህንን ዘግቧል።

የኢህአዴግ ስራ አስፈፃሚ ኮሚቴ ስብሰባ ከፊታችን እሁድ መጋቢት 2 ጀምሮ እንደሚካሄድ ተገለፀ።

የኢህአዴግ ፅህፈት ቤት ሀላፊ አቶ ሽፈራው ሽጉጤ ዛሬ በሰጡት ጋዜጣዊ መግለጫ ስራ አስፈፃሚ ኮሚቴው የግንባሩ አባል የሆኑት አራት ብሄራዊ ድርጅቶች የኢህአዴግ ስራ አስፈፃሚ ኮሚቴ ግምገማ መሰረት አድርገው ባካሄዱት ግምገማ ውጤት ላይ ይወያያል። የኢህአዴግ ስራ አስፈፃሚ ኮሚቴ በታህሳስ ወር ባካሄደው ስብሰባ ያስተላለፋቸው ውሳኔዎች በየብሔራዊ ድርጅቶች እንዴት እየተፈፀሙ እንዳሉ የሚገመግም ይሆናልም ብለዋል።

ስራ አስፈፃሚ ኮሚቴው ሀገሪቱ ያለችበትን ወቅታዊ ሁኔታና የጥልቅ ተሃድሶውን አፈፃፀም መነሻ በማድረግ ስራ አስፈፃሚው ያሳለፋቸው ውሳኔዎችና ያስቀመጣቸው አቅጣጫዎች ያሉበትን ደረጃ ገምግሞ ቀጣይ አቅጣጫዎችን እንደሚያስቀምጥም ጠቁመዋል። ከዚህ በተጨማሪም ኮሚቴው በስብሰባው ባለፉት ስድስት ወራት በመላው ሀገሪቱ የተከናወኑ ስራዎችን እና ፀድቀው ወደ ስራ የገቡ እቅዶችን አፈፃፀም እንደሚገመግምም አንስተዋል።

በተጨማሪም የኢህአዴግ ሊቀመንበር አቶ ኃይለማርያም ደሳለኝ ያቀረቡትን ከሃላፊነት መልቀቂያ ጥያቄ ተከትሎ የተፈጠረውን የአመራር ጉድለት የማሟላት አጀንዳን ተወያይቶ ለምክር ቤቱ እንደሚያቀርብ አቶ ሽፈራው ገልፀዋል።

በሌላ በኩል በኢህአዴግ ህገ ደንብ መሰረት የድርጅቱ ጉባዔ ከ2 ዓመት እስከ 2 አመት ከ6 ወር ባለው ጊዜ ውስጥ መካሄድ ሲገባው፤ በፀጥታና ወቅታዊ ጉዳዮች የተነሳ ባለመካሄዱ ምክር ቤቱ በህገ ደንቡ ላይ በተቀመጠለት ሃላፊነት መሰረት ጉባዔው የሚካሄድበትን ወቅት ይራዘም፤ አይራዘም በሚለው ላይ ውይይት ያካሂዳል ነው ያሉት

የሁሉም ብሔራዊ ድርጅቶች ማዕከላዊ ኮሚቴዎች የየብሔራዊ ድርጅቶቹ ጉባኤ በስድስት ወር እንዲራዘም ውሳኔ በማሳለፋቸው እና አሁን በኢሕአዴግ ምክር ቤት ውሳኔ ላይ የሚሳተፉትም የብሔራዊ ድርጅቶቹ ማዕከላዊ ኮሚቴ አባላት በመሆናቸው ጥያቄው ተቀባይነት አግኝቶ እስከ ነሃሴ ወር ድረስ ሊራዘም እንደሚችል እምነታቸውን ገልፀዋል።

የኢህአዴግ ስራ አስፈፃሚ ኮሚቴ ታህሳስ ላይ ባደረገው ውይይት ወቅታዊ ሁኔታዎችን ታሳቢ በማድረግ አስቸኳይ ጊዜ አዋጅ ተግባራዊ ሊሆን እንደሚችል በተባበረ ድምፅ ወስኖ እንደነበር ያስታወሱት አቶ ሽፈራው፥ ከስብሰባው በኋላ በምስራቅ አማራ አካባቢዎች እና ኋላም በኦሮሚያ ክልል አንዳንድ አካባቢዎች የፀጥታ ችግር በመነሳቱ አዋጁ ተግባር ላይ መዋሉን ገልፀዋል።

በአንድ በኩል የአስቸኳይ ጊዜ አዋጁን ተግባራዊ ማድረግና የሃገሪቱን የፀጥታ ችግር ማስተካከል በሌላ በኩል ደግሞ የብሔራዊ ድርጅቶች የተናጠል ጉባዔዎችን ማካሄድ ወቅታዊ ስራዎች ስለነበሩ የኢሕአዴግ ስራ አስፈጻሚና የምክር ቤቱ ስብሰባዎች እስካሁን አለመካሄዳቸውን አንስተዋል።

ከስራ አስፈፃሚ ኮሚቴው ስብሰባ መጠናቀቅ በኋላም የኢህአዴግ ምክር ቤት ስብሰባ እንደሚካሄድም አቶ ሽፈራው ገልፀዋል። በዚህ የምክር ቤቱ ስብሰባም የኢህአዴግ ሊቀመንበር እንደሚመረጥ ነው የጠቆሙት። በድርጅታዊ እንቅስቃሴ፣ ችግሮች እና መፍትሄዎች ላይም ምክር ቤቱ ተወያይቶ ውሳኔዎችን እንደሚያሳልፍ እና አቅጣጫዎችን እንደሚያስቀምጥ ይጠበቃል።

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: