በሚሊዮኖች የተመዘበረው የደብረ ጽጌ ቅዱስ ዑራኤል ሒሳብ በውጭ ኦዲተር ሊመረመር ነው

በእግድ ላይ ካሉት የቀድሞ የጽ/ቤት ሓላፊዎች መካከል ሒሳብ ሹሙና ተቆጣጣሪው ቀርበው ኦዲት እንዲያስደርጉ በደብሩና በሀገረ ስብከቱ በወጣ ማስታወቂያ ተደጋጋሚ ጥሪ ቢተላለፍላቸውም ፈቃደኛ ባለመኾናቸው በፍ/ቤት ተገደው እንዲቀርቡ ለማድረግ· 

  

ምርመራው ሳይደረግ የሰበካ ጉባኤ ምርጫ እንዲካሔድ ያዘዙት የሀገረ ስብከቱ ሥራ አስኪያጅ አቤቱታ ቀረበባቸው – ሰንደቅ ጋዜጣ

በኢትዮጵያ ኦርቶዶክስ ተዋሕዶ ቤተ ክርስቲያን የአዲስ አበባ ሀገረ ስብከት፣ የደብረ ጽጌ ቅዱስ ዑራኤል ቤተ ክርስቲያን ሒሳብ በውጭ ኦዲተር እንዲመረመር ቅዱስ ፓትርያርኩ አዘዙ፡፡

ፓትርያርክ አቡነ ማትያስ ትእዛዙን የሰጡት፣ በደብሩ ላይ ተፈጽሟል በተባለ ከፍተኛ ብክነትና ምዝበራ የታገዱት የቀድሞው የጽ/ቤት ሓላፊዎች በሕግም እንዲጠየቁ ሰበካ ጉባኤውና የአጥቢያው ምእመናን ያቀረቡትን አቤቱታ ተከትሎ መኾኑ ታውቋል፡፡

በሥራ ላይ የሚገኘው ሰበካ ጉባኤና የአጥቢያው ምእመናን፣ ባለፈው ሳምንት ረቡዕ ከጉዳዩ ጋራ በተያያዘ ከቅዱስ ፓትርያርኩ ጋራ መነጋገራቸው ተገልጿል፡፡ በውይይቱ ላይ፣ የቀድሞዎች የጽ/ቤት ሓላፊዎች ከታገዱ በኋላ የውጭ ኦዲት ሥራው እንዲካሔድ ሀገረ ስብከቱም በተስማማው መሠረት ቅድመ ዝግጅቱ ቢጠናቀቅም፣ ኦዲቱ ሳይከናወን ነባሩ ሰበካ ጉባኤ ወርዶ አዲስ ምርጫ እንዲደረግ በሀገረ ስብከቱ ሥራ አስኪያጅ ተደጋጋሚ ግፊት እየተደረገባቸው እንደኾነ ምእመናኑ ለፓትርያርኩ አስታውቀዋል፡፡

ባለፈው ጥቅምት 2010 ዓ.ም. መጨረሻ የቀድሞው አስተዳዳሪና አምስት የጽ/ቤት ሓላፊዎች፣ ከአሠራር ጥሰት እንዲሁም በ1 ነጥብ 9 ሚሊየን ብር ምዝበራና ብክነት ሳቢያ በሕዝብ ርምጃና በሀገረ ስብከቱ ውሳኔ ከታገዱ በኋላ ጉዳዩ ተጣርቶ ተጠርጣሪዎቹ በሕግም እንዲጠየቁ ኦዲተሮችን ለመምረጥ ጨረታ ወጥቶ አሸናፊው ታውቆ ወደሥራው ለመግባት ደብሩ በዝግጅት ላይ ቢገኝም፣ “በሥራ ላይ ያለው ሰበካ ጉባኤ የሥራ ዘመኑን ጨርሷል” በሚል እንዲወርድና አዲስ ምርጫ እንዲካሔድ፣ የሀገረ ስብከቱ ሥራ አስኪያጅ መ/ር ጎይተኦም ያይኑ በክፍለ ከተማው ቤተ ክህነት ጽ/ቤቱ በኩል በሚጽፏቸው ደብዳቤዎች ጫና መፍጠራቸው ሌላ ዙር አለመግባባትን ፈጥሯል፡፡

ሦስት ዓመት ያስቆጠረውና በሓላፊነት ላይ ያለው ሰበካ ጉባኤ፣ “ሌቦችን ያጋለጠልን ነው፤ የሚወርደውም ሒሳቡና ሁሉም ነገር ተጣርቶ ነው፤” ያሉት ምእመናኑ፣ የኦዲት ምርመራው ተጠናቆ በቃለ ዐዋዲው ድንጋጌ መሠረት የተሟላ የሥራና የፋይናንስ ሪፖርት ሳያቀርብ መሰናበትና ሌላ ምርጫ መካሔድ እንደሌለበት ለፓትርያርኩ መግለጻቸውን ተናግረዋል፡፡

አቤቱታውን ያደመጡት ቅዱስ ፓትርያርኩ፣ ሰበካ ጉባኤው ምእመናኑ ያመኑበትና ጠንካራ እንደኾነ መግለጻቸውንና ኦዲቱ እስከሚከናወን ድረስ ምርጫው ዘግይቶ ሒደቱ እንዲፋጠን መመሪያ መስጠታቸውን ምእመናኑ አስታውቀዋል፡፡ ይኹንና የሀገረ ስብከቱ ሥራ አስኪያጅ፣ ከቅዱስነታቸው መመሪያ በተቃራኒ፣ ምርጫው እንዲካሔድ በድጋሚ እንዳዘዙና በጽሑፍ የሰጡትን መመሪያ እስከ አሁን እንዳላነሡ ጠቁመዋል፡፡

“እኛ ሠላም ነው የምንፈልገው፤ ቅዱስነታቸውም መርተውልናል፤ ሰበካ ጉባኤው አሁን አይወርድም፤” የሚል የጋራ አቋም በምእመናኑ መያዙን የተናገሩት የደብሩ ምንጮች፣ “ከታገዱት የጽ/ቤት ሓላፊዎች ጋራ የእከክልኝ ልከክልህ መሸፋፈን መኖሩን የሚያሳይ ነው፤” ሲሉ የሥራ አስኪያጁን አካሔድ ተችተዋል፡፡

በእግድ ላይ ካሉት የቀድሞ የጽ/ቤት ሓላፊዎች መካከል ሒሳብ ሹሙና ተቆጣጣሪው ቀርበው ኦዲት እንዲያስደርጉ በደብሩና በሀገረ ስብከቱ በወጣ ማስታወቂያ ተደጋጋሚ ጥሪ ቢተላለፍላቸውም ፈቃደኛ ባለመኾናቸው በፍ/ቤት ተገደው እንዲቀርቡ ለማድረግና በቅዱስ ፓትርያርኩ መመሪያ መሠረት የውስጥ ኦዲቱን ለማስጀመር በእንቅስቃሴ ላይ መኾናቸውን ለጉዳዩ ቅርበት ያላቸው የደብሩ ምንጮች አስታውቀዋል፡፡

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s