Advertisements

ጠ/ሚ አብይ እሳቸውን ጨምሮ በአምስት የኦህዴድ አመራሮች ላይ የእስር ማዘዣ ተቆርጦብን ነበር አሉ ተባለ፤ የህግ ጥያቄ ያነሱ አሉ!

ጠቅላይ ሚኒስትር አብይ አሕመድ የኢሕአዴግ ሊቀመንበር ሆነው ከመመረጣቸው አምስት ቀን ቀደም ብሎ የእስር ማዘዣ ተቆርጦባቸው እንደነበር ገለጹ።ዶክተር ሰማኸኝ ጋሹ የህግና የአሰራር ደንቦችን በመጥቀስ ጥርጣሬያቸውን አስቀምጠዋል። መረጃውንም እንደማያምኑ ተናግረዋል።

ዶክተር አብይ አህመድ ይህንን የገለጹት ለሃይማኖት አባቶች፣ለአባገዳዎች፣ለሀገር ሽማግሌዎች፣ለሃይማኖት አባቶች፣ለኪነጥበብ ባለሙያዎችና ለአትሌቶች በተዘጋጀ መድረክ ላይ መሆኑም ተመልክቷል።

ትላንት ምሽት በብሔራዊ ቤተመንግስት በተካሄደው ስነ ስርአት ላይ እሳቸውንና አቶ ለማ መገርሳን ጨምሮ በአምስት የኦሕዴድ ባለስልጣናት ላይ የእስር ማዘዣ ተቆርጦ ነበር ማለታቸውን በስብሰባው ላይ የታደሙ ምንጮች ለኢሳት ገልጸዋል።

የኦሮሚያ ክልል ፕሬዝዳንት አቶ ለማ መገርሳ ከሀገር ውጪ በመሆናቸው በስብሰባው ላይ አልተገኙም። ሚያዚያ 22/2010 በኢዮቤልዩ ቤተመንግስት በተካሄደው መድረክ የኪነጥበብ ባለሙያዎችና አትሌቶች ጭምር መታደማቸው ታውቋል።

በዚህ መድረክ ላይ ለተገኙት የሃይማኖት አባቶች፣ አባገዳዎችና የሃገር ሽማግሌዎች ዶክተር አብይ አህመድ ባደረጉት ንግግር ወደ ስልጣን ከመምጣታቸው ጥቂት ቀናት ቀደም ብሎ የነበሩበትን አስቸጋሪ ሁኔታ ለተሰብሳቢው ገልጸዋል።

“ዛሬ እዚህ ከፊታችሁ እንድቆም ቄሮዎች ትልቅ ዋጋ ከፍለዋል”በማለት በኦሮምኛ የጀመሩትን ንግግር የቀጠሉት ዶክተር አብይ አህመድ “በትግሉ ውስጥ ኦሮሞዎች ብቻ ሳይሆኑ አማሮች፣ደቡቦችና ሌሎችም ብሔሮች የማይናቅ ሚና ተጫውተዋል”ማለታቸውን በስብሰባው የታደሙ የኢሳት ምንጮች ገልጸዋል።

ጠቅላይ ሚኒስትር አብይ አሕመድ ንግግራቸውን በመቀጠልም”የኢሕአዴግ ሊቀመንበር ምርጫ ሊካሄድ 5 ቀናት ሲቀሩት እኛን ለማሸማቀቅ የማሰሪያ ትዕዛዝ አወጡብን”በማለት ተናግረዋል። ትዕዛዙ የወጣው ማለትም እንዲታሰሩ የተወሰነባቸው እሳቸው፣የኦሮሚያ ክልል ፕሬዝዳንት አቶ ለማ መገርሳና በሌሎች ሶስት የኦሕዴድ አባላት ላይ እንደሆነም ገልጸዋል።

ሕዝቡ ከእኛ ጋር በመሆኑ የሚያስፈራን ነገርም አልነበረም ሲሉ ገልጸዋል። ያንን ሁሉ አልፈን ግን ዛሬ ለዚህ በቅተናል ያሉት ዶክተር አብይ አሕመድ ለዚህ ነጻነት የተዋደቁ ቄሮዎችና ሌሎች ይህንን ነጻነት ቢያዩ ምን ነበር ሲሉ መቆጨታቸውን ምንጮቹ ገልጸዋል።

ስለብሔራችን ከምንጨነቅ ለአንዲት ኢትዮጵያ ብናስብ ይሻላል በማለትም መልዕክታቸውን ባስተላልፉበት በዚህ መድረክ አቶ ለማ መገርሳ ትልቅ መስዋዕትነት መክፈላቸውን መስክረዋል። ሆኖም አቶ ለማ መገርሳ ከሀገር ውጭ በመሆናቸው በዝግጅቱ ላይ እንዳልነበሩም የኢሳት ምንጮች ገልጸዋል።

በዚህ መድረክ ዝነኛው የኦሮምኛ ሙዚቃ አቀንቃኝ አሊ ቢራ፣ቀመር የሱፍ፣ታደለ ገመቹና ደመረ ለገሰን ጨምሮ ሌሎች ድምጻውያንም ተሳትፈዋል። የሙዚቃ ስራዎቻቸውንም አቅርበዋል። ከአትሌቶች ቀነኒሳ በቀለ፣ስለሺ ስህን፣ጥሩነሽ ዲባባ፣ገዛሕኝ አበራና ሌሎችም መገኘታቸውን ምንጮቹ ገልጸዋል። ይህ በእንዲህ እንዳለም ጠቅላይ ሚኒስትር አብይ አሕመድ በክልሎች የሚያደርጉትን ጉብኝት በመቀጠል ዛሬ ቤንሻንጉል ጉምዝ ክልል አሶሳ ገብተዋል። ዶክተር አብይ ሁለተኛውን የውጭ ጉዟቸውን ነገ በሱዳን ካርቱም እንደሚያደርጉም ታውቋል።

ዜናውን የተከታተሉት ዶክተር ሰማኸኝ ጋሹ ” ዶ/ ር አብይ እኔ እና አቶ ለማ ልታሰር ማዘዣ ወጥቶብን ነበር አሉ የተባለውን እውነት ብለው ከሆነ ግራ የሚያጋባ ነው። አንደኛ ወያኔ በዛ ደረጃ ማሰር ከፈለገ የእስር ማዘዣ የማውጣቱ ነገር አጠራጣሪ ነው። ማሰር ከፈለ አስሮ ፍርድ ቤት ከማቅረብ የሚያግደው የለም። ሁለተኛ ወያኔ አብይና ለማ የፓርላማ አባል እንደሆኑ እያወቀ የእስር ትእዛዝ የማውጣቱ ነገር ያጠራጥራል። ይህን የምለው ወያኔ ህግ ያከብራል በሚል ሳይሆን ሁሉንም ነገር ህጋዊ የማስመሰል ከፍተኛ ልምድ ስላለው እንዲህ አይነት ስህተት አይሰራም። ሌላውና ዋናው ነገር በጊዜው ከነበረው ውጥረት አኳያ ወያኔ ለማንና አብይን አስሮ ሰላም አገኛለሁ ብሎ አስቦ ነው ማዘዣ የሚያወጣባቸው ? የማይመስል ነገር ነው። ይህችን ነገር የወረወሩልን አንዳንዶቻችን የለውጥ ሃይል እንደሆኑ መጠራጠር ስለጀመርን የበለጠ እንድናምናቸው ሊሆን ይችላል።” ሲሉ በግል የፌስ ቡክ ገጻቸው ጸፈዋል። 

(ኢሳት ዲሲ–ሚያዚያ 23/2010) 

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: