Advertisements

ለሰሜን አሜሪካ ስፖርት ፌዴሬሽን – “በስታዲዬም ጫጫታ የኢትዮጵያ ችግር አይፈታም” ሀብታሙ አያሌው

በሆይ ሆይታ በእስታዲዬም ጫጫታ የኢትዮጵያ ችግር አይፈታም። ስንት ጊዜ በቀቢፀ ተስፋ እንነዳለን ? ስንት ዘመን አስረው ያሰቃዩን ሲፈቱን ዩኒቨርስቲ አስገብተው ያስመረቁን ይመስል ለማጨብጨብ እንቆማለን የሚል ጥያቄም በህሊናዬ ይመላለሳል። እርቅና ስምምነት በሰከነ መንገድ ከሚመለከታቸው የፖለቲካ አካላት ጋር በመነጋገር እንጂ

ከሀብታሙ አያሌው

Ethiopian Sports Federation in North America.

የከበረ ሰላምታ አስቀድማለሁ ! ወደ ፍሬ ነገሩ በማለፍም እንደ አንድ ኢትዮጵያዊ ሃሳብና ስሜቴን ለቦርዳችሁ በደብዳቤ ለማቅረብ ወዳነሳሳኝ ሃሳብ አልፋለሁ። ጠቅላይ ሚንስትር ዶ/ር ዓብይ አህመድ ዘንድሮ በአሜሪካ እና በአውሮፓ የኢትዮጵያውያን የስፖርት ፌድሬሽን በዓል ላይ ለመገኘት እና ንግግር ለማድረግ እንደጠየቁ መገናኛ ብዙሃኖች በመዘገብ ላይም ናቸው። ተያይዞም ሰኞ ፌድሬሽኖቹ ምላሽ ይሰጣሉ ተብሎ እንደሚጠበቅ እየተነገረ ይገኛል።

የአውሮፓው ፌዴሬሽንም የሰሜን አሜሪካውን ፌዴሬሽን መልስ ከሰማሁ በኋላ ምላሽ እሰጣለሁ ማለቱም በዘገባዎች ተካትቷል። የተከበራችሁ ፌድሬሽኑ የቦርድ አመራሮች ነገሩን በጥንቃቄ እንድታጤኑት እጠይቃለሁ! እንደ አንድ ኢትዮጵያዊ መርህ መጣስ የፌዴራሽኑን ህልውና ለአደጋ ያጋልጣል ብዬም እሰጋለሁ። የዲያስፖራውን ፖለቲካ በእስፖርት መካከል መፈለግም ለጠቅላይ ሚኒስትሩም ቢሆን ጠቃሚ አይመስለኝም።

በሆይ ሆይታ በእስታዲዬም ጫጫታ የኢትዮጵያ ችግር አይፈታም። ስንት ጊዜ በቀቢፀ ተስፋ እንነዳለን ? ስንት ዘመን አስረው ያሰቃዩን ሲፈቱን ዩኒቨርስቲ አስገብተው ያስመረቁን ይመስል ለማጨብጨብ እንቆማለን የሚል ጥያቄም በህሊናዬ ይመላለሳል። እርቅና ስምምነት በሰከነ መንገድ ከሚመለከታቸው የፖለቲካ አካላት ጋር በመነጋገር እንጂ እስታዲዬም ለስፖርት ፌስቲቫል የሚመጣው ህዝብ መካከለል ተገኝቶ በመከፋፈል በመረበሽ ሊመጣ አይችልም።

አፋኝ ህጎችን ይሰርዙ፣ አስቸኳይ አዋጁን ያንሱ፣ የቀሩትን እስረኞች በሙሉ ይፍቱ፣ የገደሉና ያፈናቀሉትን የሚያጣራ ገለልተኛ ቦርድ ይቋቋም፣ ብሄራዊ እርቅ ይደረግ። ያኔ 100% አስተማማኝ ለውጥ ይሆናል። ያኔ ዶክተር አብይ በክብር ይጋበዛል !! ያኔ ሁላችንም በጋራ ቆመን በጭብጨባና በእልልታ እንደ ኢያሪኮ ቅጥር የፀብ ግድግዳን እናፈርሳለን። ይህ ዶክተር አብይ ከበረቱ ለሚቀጥለው አመት ይደርሳል። ስለ ኢትዮጵያ እና ስለ ህዝቧ የመስዋዕት በግ ሆኖ ዛሬ ዶክተር አብይ በሚመሩት ድርጅት ስቃይ የተቀበለውን አንዷለም አራጌን ፖለቲከኛ ስለሆነ በሚል ከግብዣው ተርታ አስቀርተን ለጠቅላዩ መፍቀድ ብርቱ ሃጢያት ይሆናል። ስለ ኢትዮጵያ እራሱን የበረሃ ሲሳይ ያደረገውን ፕሮፌሰር ብርሃኑ ነጋን አልፈን ጠቅላዩን ቤት ለእንግዳ ብንል የበደል ሁሉ በደል ይሆናል። እናም ፌዴሬሽኑ ያስብበት።

ጠቅላያችንን ለእስካሁኑ ስራው ከጨካኝ ድርጅታቸው ነጥለን እናመሰግናለን!!! ፍፃሜያቸው እንዲያምርም የበኩላችንን እናደርጋለን!!

ሀብታሙ አያሌው

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: