Advertisements
Fri. Sep 21st, 2018

ሕወሃት – የትግራይ ህዝብን ጥቅም በሚነካ ጉዳይ እጁን አያሰገባም አለ

የትግራይ ሕዝብ ነጻ አውጪ ግንባር / ሕወሃት የትግራይን ህዝብ ጥቅም በሚነካ ማናቸውም ጉዳዮች ላይ እጁን እንደማያስገባ አስታወቀ። የአልጀርሱን ስምምነት ሙሉ በሙሉ መቀበል ከትግራይ ህዝብ ሲቀርብ የነበረውን ተደጋጋሚ የረዥም ጊዜ ጥያቄ መመለስ እንደሆነም አመልከተ።

የሕዝባዊ ወያኔ አርነት ግንባር በመገለጫው የትግራይ ህዝብ በተለያዩ መድረኮች የኢትዮጵያና ኤርትራ ጉዳይ በሰላማዊ መንገድ እንዲፈታ ለህወሓት እና ለኢፌዴሪ መንግስት ጥያቄውን ሲያቀርብ መቆየቱን በማመለከት ነው ጥያቄውን የሕዝብ እንደሆነ የገለጸው። አክሎም ውሳኔው የትግራይን ህዝብ የሚጎዳ ባለመሆኑ ህዝቡ በሚናፈሱ ወሬዎች መደናገር እንደማይገባው ገልጿል። ፋና መግለጫውን ጠቅሶ የሚከተለውን ዘግቧል።

በቅርቡ በኢትዮ – ኤርትራ ጉዳይ ላይ የተላለፈው ውሳኔ የሃገራቱን ሰላም በተለይም የትግራይ ህዝብ ለበርካታ አመታት ሲያነሳው የነበረውን ጥያቄ በመመለስ የሁለቱን ሃገራት ህዝቦች ወንድማማችነት ወደ ነበረበት ለመመለስ የቀረበ መሆኑን ህዝባዊ ወያነ ሃርነት ትግራይ (ህወሓት) ገለጸ።

የኢህአዴግ ስራ አስፈጻሚ ኮሚቴ ባለፈው ማክሰኞ ባካሄደው ስብሰባ በኢትዮጵያና በኤርትራ መካከል ያለውን የድንበር አለመግባባት ለመፍታት፥ ኢትዮጵያ የአልጀርሱን ስምምነት ያለ ምንም ቅድመ ሁኔታ ለመተግበር መወሰኗን መግለጹ ይታወሳል።

በዚህም መሰረት ኢትዮጵያ የአልጀርስ ስምምነትና የአትዮ- ኤርትራ የድንበር ኮሚሽን ውሳኔ ሙሉ በሙሉ በመቀበል ለተግባራዊነቱ እንደምትሰራም አቅጣጫ አስቀምጧል። 

በስራ አስፈጻሚ ኮሚቴው የተላለፈው ውሳኔም የሃገራቱን ሰላም በተለይም የትግራይ ህዝብ ለበርካታ አመታት ሲያነሳው የነበረውን ጥያቄ በመመለስ፥ የሃገራቱን ህዝቦች ወንድማማችነት ወደ ነበረበት ለመመለስ መተላለፉን ህዝባዊ ወያነ ሃርነት ትግራይ (ህወሓት) ገልጿል።

ድርጅቱ ውሳኔው አስመልክቶ ባወጣው መግለጫ የትግራይ ህዝብ በተለያዩ መድረኮች የኢትዮጵያና ኤርትራ ጉዳይ በሰላማዊ መንገድ እንዲፈታ ለህወሓት እና ለኢፌዴሪ መንግስት ጥያቄውን ሲያቀርብ መቆየቱን አመላክቷል።

መግለጫው የኢትዮ-ኤርትራ ግንኙነትን በማደስ ወደ ቀድሞ ሰላም ለመመለስ የሚደረገው ጥረት ግቡን እንዲመታና የትግራይን ህዝብ ዘላቂ ጥቅም ለማረጋገጥ የተጀመረው ትግል ተጠናከሮ እንደሚቀጥልም አንስቷል። 

በኢህአዴግ ስራ አስፈፃሚ ኮሚቴ የተላለፈው ውሳኔ አላማም የሁለቱን ሃገራት ሰላም በማረጋገጥ ብሄራዊ ጥቅምን ለማረጋገጥ መሆኑን ያነሳው መግለጫው፥ ውሳኔው የትግራይን ህዝብ የሚጎዳ ባለመሆኑ ህዝቡ በሚናፈሱ ወሬዎች መደናገር እንደማይገባው ገልጿል።

የኤርትራ መንግስትም በኢትዮጵያ መንግስት የቀረበለትን የሰላም ጥሪ ተቀብሎ ለመተግበር ዝግጁ ከሆነ፥ በአልጀርስ ስምምነት የተላለፉ ውሳኔዎችን እንደ ማዕቀፍ ለመተግበር በቀጣይ ምክክር ይጠይቃልም ነው ያለው መግለጫው። 

ከዚህ አንጻር ውሳኔው በድንበር ብቻ ሳይታጠር ብዙ ጉዳዮች የያዘ በመሆኑም፥ በቀጣይ የሚደረገው ምክክር በሁሉም ጉዳዮች እንደ ማዕቀፍ እንጅ በድንበር ጉዳይ ብቻ ተነጥሎ የሚካሄድ አለመሆኑንም ጠቅሷል።

ህወሓትም በውሳኔዎቹ እንዳሉ እንደ ማዕቀፍ በመነጋገር ዘላቂ መፍትሄ ለማግኘት በመስራት መሰረታዊ የትግራይን ህዝብ ጥቅም የሚያረጋግጥ መሆኑንም በመግለጫው አንስቷል።

ከዚህ አንጻርም ህወሓት የትግራይን ህዝብ ጥቅም በሚያሳጡ ጉዳዮች ላይ እጁን እንደማያስገባ በድጋሚ ማረጋገጥ ይፈልጋልም ነው ያለው። 

በመሆኑም በኢህአዴግ የቀረበው የሰላም ጥሪ የትግራይ እና የኤርትራን ህዝብ ወንድማማችነት ወደ ነበረበት ቦታው በመመለስ የትግራይን ህዝብ ማሕበራዊ፣ ኢኮኖሚያዊና ፖለቲካዊ ጥቅሞች የሚያጠናክር ነው ብሏል።

የሰላም ጥሪውን ዝርዝር አፈፃፀም በሚመለከትም በቀጣይ ከህዝብና አባላት ጋር በመመካከር የሚካሄድ ይሆናልም ነው ያለው የድርጅቱ መግለጫ።

Advertisements

Leave a Reply

This site uses Akismet to reduce spam. Learn how your comment data is processed.

You may missed

%d bloggers like this: