Advertisements

ደብረጽዮን ላለመበታተን የፌደራሉን ስርዓት መጠበቅ ግድ መሆኑንን አመለክቱ

“ያለን አማራጭ ተከባብሮ መኖር አልያም መበታተን ያልኩት ለመገንጠል ከሚል በመነጨ ሳይሆን የሀገሪቱ የፌደራል ስርአት እኩልነትን መሰረት ያደረገ መሆኑ ለመጠቆም የተነገረ መሆኑ፣ እርስ በርስ መከባበር ከሌለ ሃገሪቷ ወደ መበታተን ታመራለች ።  ይህ እንዳይሆን ግን የፌደራል ስርአቱን ማሰጠበቅ አስፈላጊ ነው “

ህወሓት ህገመንግስትን መሰረት አድርጎ ለሚደረግ የለውጥ ጉዞ ደጋፊ እንጂ እንቅፋት እንደማይሆን የድርጅቱ ሊቀመንበር ዶክተር ደብረፅዮን ገብረሚካኤል ተናገሩ።

በተለያዩ ወቅታዊ ጉዳዮች ላይ መግለጫ የሰጡት ሊቀመንበሩ ባለፉት አመታት በሀገሪቱ ከተመዘገቡ የልማት ስኬቶች በተጨማሪ በርካታ ጉድለቶች ታይተዋል ብለዋል።

ይህንንም መሰረት በማድረግ የህወሓት ማእከላዊ ኮሚቴ ስር ነቀል ለውጥ ያስፈልጋል ብሎ በመወሰን ለሌሎች የኢህአዴግ እህት ድርጅቶች ምሳሌ የሆነ ጥልቅ ግምገማ አካሂዶ የተለያዩ ውሳኔዎችን ማሳለፉን እና እርምጃዎች መወሰዱን አስታውሰዋል።

ዶክተር ደብረፅዮን በመግለጫቸው የህወሓት ማእከላዊ ኮሚቴ በወሰነው መሰረት ድርጅቱ ለውጥ ለማምጣት በሚያስችለው አቋም ላይ እንደሚገኝ ገልፀዋል።

ምሁራን በስፋት በክልላቸው ጉዳይ ላይ እንዲሳተፉ የሚያስችል ዕድል ተመቻችቶ የተለያዩ የጥናት ውጤቶችን ወደ ተግባር ለመለወጥ በመንቀሳቀስ ላይ ይገኛልም ብለዋል።

በዚህ ወር የሚካሄደው የድርጅቱ 13ኛ ድርጅታዊ ጉባኤ ታሪካዊ የለውጥ ጉባኤ ይሆናል ያሉት ሊቀመንበሩ፥ በጉባኤው እስካሁን የተደረጉት የለውጥ እንቅስቃሴዎች ወደተግባር ሊለውጥ የሚችል ብቁ አዲስ ትውልድ ወደ አመራርነት ይመጣል ብለዋል።

በሀገሪቱ የታዩ ጉድለቶችን ለመፍታት ለውጥ ያስፈልጋል ብሎ የሚያምነው ህወሓት ህገመንግስትን መሰረት ያደረገ እና የተገኙት ስኬቶችን እንደመነሻ የሚጠቀም የለውጥ ጉዞ አጋዥ እንደሚሆን ገልፀዋል።

ዶክተር ደብረፅዮን መቐለ በተካሄደው ሰልፍ ባስተላለፉት መልእክት “ያለን አማራጭ ተከባብሮ መኖር አልያም መበታተን” ማለታቸው ትግራይን ለመገንጠል ከሚል የመነጨ ሳይሆን የሀገሪቱ የፌደራል ስርአት እኩልነትን መሰረት ያደረገ መሆኑ ለመጠቆም የተነገረ መሆኑ አስረድተዋል።

እርስ በርስ መከባበር ከሌለ ሃገሪቷ ወደ መበታተን ታመራለች ያሉት ሊቀመንበሩ ይህ እንዳይሆን ግን የፌደራል ስርአቱን ማሰጠበቅ አስፈላጊ ነው ብለዋል።

በዛይድ ተስፋዬ – ፋና

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: