Advertisements

አዲሱ ዓመት ሌሎች ተደማሪ ድሎችን የምንጎናፀፍበት መስፈንጠሪያ ዕድል በመሆኑ ልንጠብቀው ይገባል­- ም/ጠ/ሚ ደመቀ መኮንን

የ2011 ሌሎች ተደማሪ ድሎችን የምንጎናፀፍበት መስፈንጠሪያ ዕድል በመሆኑ በዕምነት ልንጠብቀው ይገባል­ አሉ የኢፌዴሪ ምክትል ጠቅላይ ሚኒስትር አቶ ደመቀ መኮንን። ምክትል ጠቅላይ ሚኒስትር አቶ ደመቀ መኮንን የ2011 አዲስ ዓመትን አስመልክተው በሰጡት መግለጫ ነው ይህንን ያሉት።

በመግለጫቸውም፥ “በሀገራችን የቀን አቆጣጠር ቀመር መሰረት አሮጌውን የ2010 ዓመት በክብር ለመሸኘት፤ እንዲሁም የ2011 አዲስ ዓመትን ደግሞ በፍቅር ለመቀበል በታላቅ ዝግጅት ላይ እንገኛለን” ብለዋል።

“የምናጠናቅቀው የ2010 ዓመት በሀገራችን ታሪክ ዑደት ውስጥ ልዩ ስፍራ የሚይዝ ነው” ያሉት ምክትል ጠቅላይ ሚኒስትሩ፥ “በህዝባችን ብርቱ ትግል የለውጥ ድባብ ዳር እስከ ዳር የነገሰበት እንዲሁም ቀድመው የተፈፀሙ በደሎችን እና ጥፋቶችን በይቅርታ ለመሻገር ልባዊ መነሳሳት የናኘበት ድንቅ ዓመት ነበር” ሲሉም ገልፀዋል።

በ2010 ዓመት በእያንዳንዱ ዜጋ ነፍስያ ውስጥ የሚንቀለቀለው የለውጥ ሞገድ እና ልባዊ የይቅርታ መነሳሳት እንደ ማለዳ ጤዛ ታይቶ የሚጠፋ ሳይሆን በትውልዱ ባለቤትነት እየጠለቀ፣እየጠበቀ እና እየደመቀ የሚቀጥል ሲሆን፥ አጠቃላይ የትግሉ ውጤት ለ2011 አዲሱ ዓመት ለእናት ሃገራችን የተበረከተ ልዩ “የድል ስጦታ” ተደርጎ የሚወሰድ ነውም” ብለዋል።

ይህ “የድል ስጦታ” በአዲሱ የ2011 ዓመት በቀጣይ ሌሎች ተደማሪ ድሎችን የምንጎናፀፍበት መስፈንጠሪያ ዕድል በመሆኑ በዕምነት ልንጠብቀው ይገባልም ነው ያሉት አቶ ደመቀ።

“የተቀጣጠለው የለውጥ ስሜት ቀጣይነቱን በማረጋገጥ አስቀድመው የተጀመሩ በጎ ስራዎችን እያስፋፋን፤ የጎደለውን እየሞላን፤ የቀደመውን ደግሞ በእጅጉ እያላቅን ድሃው ደጅ ዘልቆ የሚደርስ ተጨባጭ ስራ መስራት ይጠበቅብናል ብለዋል በመግለጫቸው።

“በአንፃሩ በኛ ዘመን የተፈፀሙ ጥፋቶች እና በደሎች ዳግም እንዳይፈፀሙ ብቻ ሳይሆን በአስተሳሰብ ደረጃ በትውልዱ ልቦና ውስጥ ታትመው እንዳይዘልቁ በእውነተኛ ይቅርታ ልንሽራቸው እና ልንሻገራቸው ይገባል” ሲሉም አስታውቀዋል።

በቂም እና በቁርሾ ስሜት ውስጥ መዳከር ሽራፊ ፀጋ እንደሌለው ለረጅም ዓመታት ካለፍንበት የጥፋት ጎዳና እና ታሪክ ከማያልፈው የክፋት ዳና በሚገባ አይተነዋልም ብለዋል ምክትል ጠቅላይ ሚኒስትሩ።

ምክትል ጠቅላይ ሚኒስትር አቶ ደመቀ አክለውም፥ “ባልነበርንበት ዘመናት ለተፈፀሙ ጥፋቶች በምንም መልኩ ልናርማቸው አንችልም፤ ነገር ግን ልንማርባቸው እንችላለን፤ እንግዲህ በኋላ ታሪክ የምንማርበት እንጂ የምንንተራሰው ሊሆን አይገባም” ብለዋል።

ካለፍንበት እኩይ ታሪክ ከልብ ልንማርበት እና ከእውነት ልንለወጥበት የሚገባን ዘመን ላይ ደርሰናል ያሉት አቶ ደመቀ፥ ለዚህም ነውአሮጌው ዘመን አልፎ አዲሱ ዘመን ሲተካ በታላቅ ብሄራዊ ስሜት “በፍቅር እንደመር በይቅርታ እንሻገር!” የተባለው ሲሉም አስታውቀዋል።

“ለሃገራችን የዕድገት ትንሳኤ በእጃችን የጨበጥነውን ወርቃማ ዕድል ከፊት ለፊት በርካታ ወርቃማ ድል ለማስመዝገብ የሚያስችለን በመሆኑ በጥበብ ልንጠቀምበት ይገባል” ብለዋል።

“መጪው ዘመን ሁላችንም በተሰማራንበት ዘርፍ የምንናገረውን በተግባር ሆነን የምንገኝበት፤ በንፁህ ልብ የምንተሳሰብበት፤ እንዲሁም አንድነታችን የሚጠብቅበት እንዲሆን ከልብ እመኛለሁ” ማለታቸውን ከምክትል ጠቅላይ ሚኒስትር ጽህፈት ቤት ያገኘነው መረጃ ያመለክታል።

ኤፍ.ቢ.ሲ –

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: