Advertisements

በኢትዮ-ኤርትራ ድንበር የነበረው የመከላከያ ሰራዊት ከዛሬ ጀምሮ ወደ ካምፕ እንዲገባና እንዲያገግም ይደረጋል- ጠ/ሚ አብይ

በኢትዮጵያ እና ኤርትራ ድንበር አካባቢ የነበረው የመከላከያ ሰራዊት ከዛሬ ጀምሮ ወደ ካምፕ በመግባት እንዲያገግም ይደረጋል አሉ የኤፌዴሪ ጠቅላይ ሚኒስትር ዶክተር አብይ አህመድ።

ጠቅላይ ሚኒስትር ዶክተር አብይ አህመድ ከፕሬዚዳንት ኢሳያስ አፈወርቂ እና ሌሎች የሁለቱ ሀገራት ባለስልጣናት፣ ህዝቦችና ሰራዊቶች ጋር በመሆኑን ኢትዮጵያ እና ኤርትራ ድንበር ላይ አዲስ ዓመትን አክብረው ወደ አዲስ አበባ ተመልሰዋል።

ጠቅላይ ሚኒስትር ዶክተር አብይ በቦሌ ዓለም አቀፍ አውሮፕላን ማረፊያ ሲደርሱ በሰጡት መግለጫም፥ ሁለቱ ሀገራት ድንበር ላይ የነበረው የአዲስ ዓመት መቀበያ በዓል አስደሳች እንደነበረ ተናግረዋል።

ጠቅላይ ሚኒስትር ዶክተር አብይ፥ በቡሬ ድንበር ላይ በተካሄደው የበዓል አከባበር ላይ የኢትዮጵያ እና ኤርትራ ሰራዊቶች ተቃቅፈው የጨፈሩበት፤ የሁለቱ ሀገራት ሰንደቅ አላማዎች በክብር የተውለበለቡበት እጅግ በጣም ደስ የሚል ጊዜ ነበረ ብለዋል።

በተመሳሳይ በዛላምበሳ ድንበር የሁለቱ ሀገራት ህዝቦች፣ ሰራዊቶች እና መሪዎች በተገኙበት የአዲስ ዓመት በዓል ተከብሯል ያሉ ሲሆን፥ በዚሁ ወቅትም የየብስ ትራንስፖርትን በይፋ የማስጀመር ስራ ተሰርቷል ሲሉም ተናግረዋል።

“የዛሬው የበዓል አከባበር የተካሄደው አዲሱን ዓመት በጋራ እንደምናከብር ቃል መግባታችንን ተከትሎ ነው” ያሉት ዶክተር አብይ፥ ይህም በዛሬው እለት ተሳክቶ ድንበር በማፍረስ በጋራ አዲስ ዓመት ማክበር ችለናል ነው ያሉት።

አዲስ ዓመትን ስናከብር በአዲስ ተስፋ በመሆኑ ሰላም እና ተስፋን ደርቦ መቀበል በቀጣይ ለሚጠብቅ ስራ አጋዥ ስለሚሆን በዓሉን በጋራ ማክበር አስፈለገም ተናረዋል።

በዛሬ እለት በነበረው ሁነት ያየነው ነገር እጅግ በጣም የሚያሳዝን ነው ያሉት ጠቅላይ ሚኒስትር ዶክተር አብይ፥ የሁለቱ ሀገራት ወታደሮች በጣም ሙቀት ባለው ምሽግ ውስጥ ለባንድራ ክብር ሲሉ ተቀምጠው በጣም ተጎሳቅለዋል ብለዋል።

የሁለቱ ባንዲራ እኩል ሲውለበለቡ ስናይ እና ሁለቱን ባንዲራ ከጦርነት፣ ከፀብና ከጥላቻ ውጭ በፍቅርና በሰላም እኩል እንዲውለበለቡ ማድረግ እየተቻለ በተቃርኖ የተሰራው ስራ አሳዛኝ ነው፤ ነገር ግን ትምህርት የምንወስድበት ሊሆን ይገባልም ብለዋል።

ከዚህ በመነሳትም ከዚህ በኋላ ከሌሎች ሀገራት ጋርም ይሁን እርስ በእርስ ሰው ለመግደል መበርታት የለብንም፤ ይልቁንም እውቀታችንን እና ጉልበታችንን በመሰብሰብ የሚራቡትን ለማገዝ እና ራስን መለወጥ ላይ መበርታት አለብንም ብለዋል።

በቀጣይ ለመስራት የታሰበው የሰላም፤ የልማትና የዴሞክራሲ ስራ መሰረት እንዲይዝ እና ሰላምን ከፍ አድርገን እንድናስብ በትብብር መስራት ይጠበቃል ሲሉም መልእክታቸውን አስተላልፈዋል።

ጠቅላይ ሚኒስትር ዶክተር አበይ፥ ከኢፌዴሪ መላከያ ሰራዊት ከዛሬ ጀምሮ ድንበር አካባቢ ላይ የነበረውን የጦርነት ስሜት በከፍተኛ ደረጃ ቀንሶ ወደ ካምፕ በመሰብሰብ የሚያገግምበት፣ የሚሰለጥንበት እና ራሱን የሚያበቃበት ሁኔታ ይፈጠራል ብለወዋል።

በኤርትራ በኩልም ተመሳሳይ ስራ ይከናወናል ብለዋል ጠቅላይ ሚኒስትር ዶክተር አብይ።

በኢትዮጵያ በኩል ሰራዊቱ ሙሉ በሙሉ ራሱን እስከሚያደራጅ ድረስ ባለው ጊዜ ውስጥ የአካባቢውን አርሶ አደር በማገዝ ወደ ልማት ስራ ትኩረቱን እንዲያደርግ ይደረጋል ብለዋል።

ከዚያ በኋላ ግን ሙሉ ቁመና ያለው ሰራዊት እንዲሆንና መለዮውን በትክክል የሚያከብር፣ ሰልፍ የሚያሳምር፣ ነገሮችን የመከወን ብቃት ያለው፣ ለመዋጋት በቂ ዝግጅት ያደረገና ከተዋጋ የሚያሸንፍ ሆኖ እንዲደራጅ ማድረግ በቀጣይ የመንሰራው ስራ ይሆናል ሲሉም ተናግረዋል።

ጠቅላይ ሚኒስትር ዶክተር አበይ አክለውም የኢፌዴሪ መከላከያ ሰራዊት እንደ አዲስ እንዲዋቀር ተገርጓል ያሉ ሲሆን፥ በአዲሱ አደረጃጀት መሰረት ያለውን ሀይል ሰብስቦ፣ ራሱን አብቅቶ፣ የኢትዮጵያን ሉአላዊነት ለመጠበቅና በልማት ስራዎቿ በመሳተፍ የህዝቦቿ እና የባንዲራዋ አልኝታ መሆኑን የሚያረጋግጥበት ዘመን ከፊታኝ ያለ መሆኑን ይሰማኛልም ብለዋል።

በመጨረሻም አዲሱ ዓመት ለመላው የኢትዮጵያ እና የኤርትራ ህዝብ የሰላም፣ የፍቅር፣ የልማት፣ የብልፅግና እና የእግድት እንዲሆን እመኛለሁ ሲሉም መልእክታቸውን አስተላልፈዋል።

በሙለታ መንገሻ – ኤፍ.ቢ.ሲ-

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: