Advertisements

በአሶሳ ዞን በህቡዕ ስልጠና ይሰጥበት የነበረ ወታደራዊ ካምፕ ተደመሰሰ፣ የ13 ዓመት እድሜ ያላቸው ታዳጊዎች ተማረኩ

አድብተው ጥፋት ለመፈጸም ዝግጅት የደረግበታል የተባለ  ካምፕ ሙሉ በሙሉ ወደም። ወታደራዊ ስልጠና ሲወስዱ የነበሩ ሃምሳ አንድ ምልምሎች ተያዙ። ከሰልጣኞቹ መካከል የአስራ ሶስት ዓመት እድሜ ያላቸው ታዳጊዎች ይገኙበታል። መጠኑ ያልታወቀ ሃይል ሸሽቶ ወደ ጎረቤት አገር መግባቱም ታውቋል።

የቢኒሻንጉል ክልል ፖሊስ ኮሚሽነር  ሰይፈዲን ሃሩን  ለመንግስት ሚዲያዎች እንዳስታወቁት፣ አሶሳ ዞን በገንገን ቀበሌ ልዩ ስሙ ዛላን ወንዝ አካባቢ በሁለት ሄክታር ላይ የተሰራው ህገወጥ ማሰልጠኛ ሙሉ በሙሉ ወድሟል።  በአሰሳው ሰላሳ አንድ የሚሆኑት ሲያዙ፣ ሃያ የሚሆኑት ደግሞ እጅ የሰጡ ናቸው። የተቀሩት ወደ ጎረቤት አገር እንዳመሩ ከኮሚሽነሩ ገለጻ ለመረዳት ተችሏል።ግለሰቦቹ የተያዙት ኅብረተሰቡ በሰጠው ጥቆማ የክልሉ ልዩ ኃይል ሰሞኑን በአሶሳ ዞን ባደረገው አሰሳ ነው፡፡

የተንቀሳቃሽ ስልኮች፣ መድኃኒትና የሕክምና መገልገያ መሣሪያዎች፣ ፓስፖርቶች፣ እንዲሁም የተለያዩ የመታወቂያ ካርዶች መገኘታቸውን ኮሚሽነሩ ተናግረዋል። ምልምሎቹ ራሱን የበርታ ህዝቦች ነጻነት ንቅናቄ (በህነን) ብሎ ከሚጠራው ኃይል ተለይተው የወጡ ቡድን አባላት ሊሆኑ እንደሚችሉ ኮሚሽነሩ ግምታቸውን ስጥተዋል።

ከአንድ ወር በላይ ስልጠና ሲከታተሉ መቆየታቸውንና ዓላማቸው ህዝብ ላይ ጉዳት ማድረስ እንደሆነ ያመለከቱት ኮሚሽነሩ፣ በክልሉ ዘላቂ ሰላምና መረጋጋትን ለማስፈን ከአገር መከላከያ ሠራዊትና ከፌዴራል ፖሊስ ጋር ተቀናጅተው በመሥራት ላይ እንደሚገኝም አስታውቀዋል። ሕዝብ በክልሉ ሰላምን ለማስፈን በሚደረገው ጥረት ድጋፉን እንዲያጠናክር ኮሚሽነር ሰይፈዲን ጥሪ አቅርበዋል።

ፎቶ – ፋና

 

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: