Advertisements

ጠቅላይ ሚንስትር አብይ የኦሞ ኩራዝ ቁጥር 3 ስኳር ፋብሪካ መርቀው ስራ አስጀመሩ::

Fitsum Arega

ክቡር ጠቅላይ ሚንስትር ዶ/ር አብይ አህመድ በዛሬው ዕለት የኦሞ ወንዝን በሚያዋስኑ በካፋና ቤንች ማጂ ዞኖች መካከል የሚገኝና በኦሞ ኩራዝ ስኳር ልማት ፕሮጀክት ስር ከሚገኙት 4 የስኳር ፋብሪካዎች አንዱ የሆነውን የኦሞ ኩራዝ ቁጥር 3 ስኳር ፋብሪካ መርቀው ስራ አስጀመሩ::

ፋብሪካው ከውጭ በተገኘ 8.1 ቢሊዮን ብር ብድር የተገነባ ሲሆን: መጋቢት 2008 ኮምፕላንት በተባለ የቻይና ኩባንያ ተጀምሮ በተሰጠው የጊዜ ገደብ በወቅቱ ያጠናቀቀ መሆኑ በምረቃ ሥነ-ሥርዓቱ ላይ ተገልጿል::

የፋብሪካው የማምረት አቅም በተለይ አገዳ የመፍጨት አቅሙ በቀን 12,000 ቶን ሲሆን: እስከ 10 ሺህ ኩንታል ስኳር በቀን ወይም ከ1.5 ሚሊዮን ኩንታል ስኳር በአመት እንደሚያመርት ታውቋል::

ፋብሪካው ሙሉ የማምረት አቅም ላይ ሲድርስ ለ12,000 ዜጎች የስራ ዕድል የሚፈጥር ሲሆን: ለዚህም ሆነ ለሌሎቹ በአካባቢው ለሚገኙ የስኳር ፋብሪካዎች አገዳ የሚያቀርቡ የመስኖ መሰረተ-ልማት: የመሬት ልማት: የእርሻና የመኖሪያ ቤቶች ፕሮጀክቶች በድምሩ ከ20 ቢሊዮን ብር በላይ ካፒታል የጠየቀ ሲሆን: ከእርሻውና ተያያዥ ልማቱ ጋር የስራ ዕድል ፈጠራው ከዕጥፍ በላይ እንደሚያድግ ይጠበቃል::

በምረቃ ሥነ-ሥርዓቱ ላይ ንግግር ያደረጉት ክቡር ጠቅላይ ሚንስትር አብይ አህመድ በበዐሉ ላይ ልምድ ለመውሰድ የተገኙትን የሃገረ ኤርትራ ፕሬዚዳንት ክቡር አቶ ኢሳያስ አፈወርቂን እንዲሁም የደቡብ ክልል ምክትል ፕሬዚዳንት በነበሩ ጊዜ ፕሮጀክቱን በመጠንሰሳቸው በእለቱ የተገኙትን የቀድሞ ጠቅላይ ሚንስትር ክቡር አቶ ኃይለማርያም ደሳለኝን ምስጋና አቅርበውላቸዋል::

በተለይ የፕሮጄክቱ ሰራተኞች: ማናጅመንቱ እና የቦርድ አመራሮች ፕሮጄክቱ በጥራት እና በጊዜ ገደቡ እንዲጠናቀቅ ላሳዩት ቁርጠኝነት ምስጋናችውንና አድናቆታቸውን ገልጸውላቸዋል::

የፋብሪካው መመረቅ በአገሪቱ ስኳር የሚያመርቱ ፋብሪካዎችን ቁጥር ወደ 8 እንዲያድግ አድርጏል::

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: