Advertisements

የተመድ የፀጥታው ምክር ቤት በኤርትራ ላይ ጥሎት የነበረውን ማዕቀብ ለማንሳት ዝግጅት ላይ መሆኑ ተገለፀ።

የተባበሩት መንግስታት ድርጅት የፀጥታው ምክር ቤት በኤርትራ ላይ ጥሎት የነበረውን ማዕቀብ ለማንሳት ዝግጅት ላይ መሆኑ ተገለፀ። ምክር ቤቱ ማዕቀቡን የሚያነሳውም ኤርትራ ከኢትዮጵያ ጋር የፈጠረችውን የሰላም ስምምነት ተከትሎ፥ ሀገሪቷ በቀጠናው ባላት ግንኙነት ላይ ያሳየችው መሻሻል በአሜሪካና በተለያዩ መንግስታት በመደገፉ ነው ተብሏል። ኢትዮጵያና ኤርትራ ባለፈው ሀምሌ ወር ላይ የሰላም ስምምነት መፈራራማቸው ይታወሳል።

ይህንን ተከትሎም አሜሪካ፣ ብሪታኒያና ፈረንሳይ ሀገሪቷ ላይ ማዕቀቡ ከመነሳቱ በፊት የምታሳየውን ለውጥ ማየት ተገቢ ነው በሚለው አቋማቸው ፀንተው ቆይተዋል።

ይሁን እንጂ ኤርትራ በቀጠናው በተለያዩ ጉዳዮች ላይ ያሳየቸው መሻሻል አሳማኝ እየሆነ በመምጣቱ  ሀገራቱ የነበራቸውን ሀሳብ መቀየራቸው ነው የተነገረው።

ኤርትራ ለሁለት አስርት ዓመታት ከኢትዮጵያ ጋር የነበራትን እስጣ ገባ በመተው ወደ ሰላም ከተመለሰችበት ጊዜ ወዲህ በአፍሪካ ቀንድ አካባቢ አንፃራዊ የሆነ መረጋጋት ተስተውሏል።

በሌላ በኩል ኤርትራ ከጎረቤት ሀገር ጂቡቲ ጋር የነበራትን ግንኙነት ለማሻሻል እና በድንበር አካባቢ የሚነሱ ግጭቶችን ለመፍታት ባለፈው መስከረም ወር ላይ ሀገራቱ በሳዑዲ አረቢያ የሁለትዮሽ ውይይት አድርገዋል።

በአውሮፓውያኑ 2009 የተባበሩት መንግስታት ድርጅት ኤርትራ አልሻባብ ለተባለው የሽብር ቡድን ድጋፍ ታደርጋለች በሚል የተለያዩ ማዕቀቦችን ተጥሎባት ነበር። ነገር ግን  ጉዳዩን የሚያጣሩት የድርጅቱ ባለሙያዎች ኤርትራ ድርጊቱን መፈጸሟን የሚያሳይ ማስረጃ ማቅረብ አልቻሉም።

የኤርትራ የውጭ ጉዳይ ሚኒስትር ኦስማን ሳልህ ባለፈው መስከረም ወር ላይ በተካሄደው የመንግስታቱ ድርጅት ጠቅላላ ጉባኤ ላይ፥ በሀገራቸው ላይ የተጣለው ማዕቀብ ያለምንም ጥፋት በመሆኑ እንዲነሳ ጠይቀዋል። ሀገሪቷ በተጣለባት ማዕቀብ ምክንያትም አስከፊ የሆነ  ኢኮኖሚያዊ ድቀት እየደረሰባት መሆኑን በአፅንኦት ተናግረዋል።

በዚህ ወቅትም ኢትዮጵያና ሶማሊያ የመንግስታቱ ድርጅት በኤርትራ ላይ የጣለዉን ማዕቀብ እንዲያነሳ ጠይቀው ነበር። በመሆኑም የተባበሩት መንግስታት ድርጅት የፀጥታው ምክር ቤት በጉዳዩ ላይ በፈረንጆቹ የፊታችን ህዳር 14 ድምፅ ይሰጣል ተብሎ ይጠበቃል።

ምንጭ፦yahoonesw.com  – FBC

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: