Advertisements

«እርምጃው የለውጡን እውነተኛነት ያረጋገጠ ነው፡፡» ተፎካካሪ የፖለቲካ ፖርቲዎች

መንግሥት በተለያዩ የሙስና ተግባራትና በሰብዓዊ መብት ጥሰቶች ላይ ተሳትፎ አድርገዋል በሚል የተጠረጠሩ ግለሰቦችን ለፍርድ ለማቅረብ መወሰኑ ለውጡን በሙሉ ልባችን እንድንደግፍና ከጠቅላይ ሚኒስትሩ ጎን እንድንቆም አድርጎናል ሲሉ ተፎካካሪ የፖለቲካ ፓርቲዎች አስታወቁ።

ፓርቲዎቹ ትናንት የፌዴራል ጠቅላይ ዓቃቤ ህግ በሙስና ተግባራትና በሰብዓዊ መብት ጥሰት ተጠርጥረው በቁጥጥር ስር የዋሉ ግለሰቦችን አስመልክቶ የሰጠውን መግለጫ ተከትሎ በተለይ ለአዲስ ዘመን ጋዜጣ እንደገለጹት፤ፓርቲዎቹ
መንግሥት መወሰድ የጀመረውን እርምጃ አድንቀዋል፤የለውጡን እውነተኛነትም ያረጋገጠ ነው፡፡

‹‹ባለፉት ሁለት አሥርት ዓመታት ስርዓቱ በሙስና የተዘፈቀ መሆኑን በተደጋጋሚ ስናነሳ ነበር፡፡›› ያሉት የሰማያዊ ፓርቲ የህዝብ ግንኙነት ኃላፊ አቶ አበበ አካሉ ፣ በብድርና በእርዳታ የመጣ የደሀ ህዝብ ሀብት ያለአግባብ ለግለሰቦች ጥቅም ይውል እንዲሁም ከአገር እንዲወጣ ይደረግ እንደነበር ተናግረዋል፡፡

‹‹በዚህ ምክንያትም በርካታ የተፎካካሪ ፓርቲዎች አባላት ተደብድበናል፤ ታስረናል፤ ብዙ ስቃይም ተቀብለናል››ብለዋል፡፡አሁን በዚህ ደም መጣጭ ድርጊት የተሳተፉ ግለሰቦች በዚህ መልኩ ለፍርድ እንዲቀርቡ ማድረግ መቻሉ «አንጀት የሚያርስ» ተግባር ነው ሲሉ ገልጸዋል፡፡ህዝቡ አሁንም ለውጡን በመደገፍ ከጠቅላይ ሚኒስትሩ ጎን መቆሙን አጠናክሮ ይቀጥላል ብለዋል።

ለውጡ አሁን ጥርስ እንዳወጣ ይሰማኛል የሚሉት አቶ አበበ፣ አሁን በሁለት እግሩ መቆም እንደሚችልም አስታውቀዋል፡፡‹‹እኛም እንደ ፓርቲ አስፈላጊ በሆኑ ነገሮች ሁሉ ከለውጡና ከጠቅላይ ሚኒስትሩ ጎን በመቆም ኃላፊነታቸውን እንወጣለን ሲሉ አረጋግጠዋል።

« እኛ ሙስናን በተዋጋን የሰብዓዊ መብት ጥሰት አለ ተገርፈናል፤አሁን ገራፊዎቻችን ጥፍር ነቃዮች፣ ሴቶችን የደፈሩ እና ያንገላቱ ወንዶችን ያሰቃዩ ግለሰቦች በዚህ መልኩ ለፍርድ ሲቀርቡ ማየታችን የነጻነት ቀናችንን ያከበርን ያህል ይሰማናል፤ ይህንን ሳያዩ የሞቱት ወገኖቻችን በጣም ያሳዝኑናል » ብለዋል። አሁንም በርካታ ሙሰኞች በየቤቱና በየተቋሙ ስላሉ እነዚህንም አጥርቶ ለፍርድ ማቅረቡ ቀጣይ የቤት ሥራ ሊሆን እንደሚገባም አሳስበዋል።

‹‹እርምጃው ጥሩ ነው ፤ሁላችንም ስንታገልለት የነበረ ነው›› ያሉት ፓለቲከኛው ፕሮፌሰር መራራ ጉዲና ፣ ‹‹የእኔ ስጋት ትላልቅ አሳዎቹ ይኑሩበት አይኑሩበት እርግጠኛ መሆን አልቻልኩም ፤ እንደ አስፈላጊ እርምጃ ግን በጥሩ ጎኑ የሚታይ ነው ብለዋል፡፡

የኢትዮጵያ መንግሥት እርምጃ አብዛኛውን ጊዜ ትኩረቱን የሚያደርገው ትናንሽ አሳዎች ላይ ነው የሚሉት ፕሮፌሰሩ፣ ‹‹ስለ ትልልቆቹ አሳዎች መረጃ ላይኖረኝ ይችላል፤ አልያም በሌላ ምክንያት ይታለፋሉ፤አሁንም ይህ ሥራ እንደዚህ ላለመሆኑ እርግጠኛ ባንሆንም እርምጃው ግን በጣም የሚያስደስት ነው ሲሉ ያብራራሉ።
ፕሮፌሰር መራራ ጉዳዩ መነካካቱ ጥሩ መሆኑን ጠቅሰው፣ የአንድ ሰሞን ግርግር እንዳይሆን ግን ስጋቱ አለኝ ይላሉ፡፡መንግሥት የአንድ ሰሞን የግርግር በሽታን ትቶ ውጤታማ የፍትህ ስርዓት በዳይን የሚቀጣ ተበዳይን የሚክስ አካሄድ መከተል እንደሚጠበቅበት አስታውቀዋል፡፡

እንደ ፕሮፌሰር መራራ ማብራሪያ፤ ሰዎችን በማሰርና ለህግ በማቅረብ ብቻ የማንወጣቸው በርካታ ችግሮች ስላሉ ፣መንግሥት ብሔራዊ መግባባት ላይ ሰርቶ ተጠያቂነት ያለው አሰራርን ማስፈን ይገባዋል። ይህ ሲሆን ህዝቡም ሌብነትን መቆጣጠር ይቻለዋል፤ በመሆኑም በዚህ ላይ ትኩረት አድርጎ መስራት ይገባል።
የሲዳማ ሀርነት ንቅናቄና የኢትዮጵያ ፌዴራላዊ ዴሞክራሲ መድረክ ፕሬዚዳንት ዶክተር ሚሊዮን ቱማቶ በበኩላቸው ‹‹ፓርቲያችን የሚታገልለት ዋናው ቁምነገር በሀገሪቱ የህግ የበላይነት እንዲሰፍን ነው››ይላሉ፡፡አሁን በመንግሥት እየተወሰደ ያለው እርምጃ እንደ ፓርቲ የምንደግፈውና ከለውጡ ጎንም እንድንቆም የሚያስችለን ነው ብለዋል።

እንደ ዶክተር ሚሊዮን ገለጻ፤ በሀገሪቱ ዴሞክራሲያዊ ስርዓትን የመገንባት ዋናው ነገር የህግ የበላይነት እንዲከበር ነው፡፡በዚህ ልክ እርምጃ መወሰድ መጀመሩ አገሪቱ ለዴሞክራሲያዊ ስርዓት ግንባታ የሰጠችውን ቦታ እንዲሁም ለውጡ ምን ያህል የእውነት እንደሆነ ያመለክታል፡፡ ወደፊትም ሌሎች ህዝብ የተበደለባቸውንና ያለቀሰባቸውን ነገሮች በማጥራት ፍትህ እንዲገኝ ማድረግ ይገባል።
በአገሪቱ የተጀመረው ህዝቦችን የማቀራረብና ብሔራዊ መግባባትን የመፍጠር እርምጃ ይበል የሚያሰኝ ነው ያሉት ፕሬዚዳንቱ፣ ይህም ተጠናክሮ ሊቀጥል እንደሚገባ ጠቁመዋል።

ጠቅላይ ዓቃቤ ህግ በሰጠው መግለጫም በሙስና 27 ሰዎች፣ በሰብዓዊ መብት ጥሰት ደግሞ 36 ሰዎች በአጠቃላይ ከ 63 በላይ ተጠርጣሪዎች በቁጥጥር ስር ውለዋል ።
ምንጭ፡- የኢትዮጵያ ፕሬስ ድርጅት

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: