Advertisements

በሰብዓዊ መብት ጥሰትና በሙስና ወንጀል የተጠረጠሩ ከ60 በላይ ተጠርጣሪዎች ለ2ኛ ጊዜ ፍ/ቤት ቀረቡ

በሰብዓዊ መብት ጥሰት እና የሙስና ወንጀል የተጠረጠሩ ከ60 በላይ ተጠርጣሪዎች ለ2ኛ ጊዜ በዛሬው ዕለት ፍርድ ቤት ቀረቡ። በሰብዓዊ መብት ጥሰት በእነ ጎሃ አጽብሃ እና በሙስና ውንጀል በእነ ብርጋዴር ጀኔራል ጠና ቁርዲ መዝገብ የተካተቱ ከ60 በላይ ተጠርጣሪዎች፥ ለ2ኛ ጊዜ በፌደራሉ ከፍተኛ ፍርድ ቤት ልደታ ምድብ 10ኛ የወንጀል ችሎት ቀርበዋል።

በሙስና የተጠረጠሩት የብረታ ብረትና ኢንጂነሪንግ ኮርፖሬሽን ሰራተኞች እና በሰብዓዊ መብት ጥሰት የተጠረጠሩት የብሄራዊ መረጃና ደህንነት አገልግሎት ሰራተኞችን ፖሊስ በቁጥጥር ስር አውሎ ምርመራ እየተደረገባቸው የሚገኝ ሲሆን፥ ህዳር 4 ቀን 2011 ዓ.ም ፍርድ ቤት መቅረባቸው ይታወሳል።

ከተጠርጣሪዎቹ መካከል እነ ብርጋዴር ጀኔራል ጠና ቁርዲ፣ ብርጋዴር ጄኔራል በረኸ በየነ፣ ብርጋዴር ጄኔራል ጥጋቡ ፈትለአብ እና ብርጋዴር ጄኔራል ሀድጉ ገብረጊዮርጊስ ይገኙበታል።

በተያያዘ ዜና ሰነድ በማሸሽ ወንጀል የተጠረጠሩት አቶ ፊልሞን ግርማዬ እና ቴወድሮስ ጣምአለው፥ ፖሊስ በዋስ ይውጡ በማለት ያቀረበውን ጥያቄ ተከትሎ ፍርድ ቤቱ ተጠርጣሪዎቹ 10 ሺህ ብር ዋስ አስይዘው እንዲወጡ ፈቅዷል።

በሌላ በኩል በሰብዓዊ መብት ጥሰት ተጠርጥረው በቁጥጥር ስር የዋሉት ወይዘሮ አዳነች ተሰማ እና ጌታነህ አሰፋ ፖሊስ በዋስ እንደለቀቃቸው ለችሎቱ ገልጿል።

ወይዘሮ አዳነች የቀድሞው የብሄራዊ መረጃና ደህንነት አገልግሎት ምክትል ዋና ዳይሬክተር የነበሩት አቶ ያሬድ ዘሪሁን ባለቤት ናቸው።

ከዚህ ባለፈም ፖሊስ በሰብዓዊ መብት ጥሰት የተጠረጠሩ ግሰለቦችን ሰነድ በማሸሽ የተጠረጠሩትን ወይዘሮ ሙሉ ፍስሃ በዋስ ይውጡልኝ ሲልም ፍርድ ቤቱን ጠይቋል።

ተጠርጣሪዋ በበኩላቸው ምንም ገቢ እንደሌላቸው በመግለጽ የቤት እመቤት መሆናቸውን ለፍርድ ቤቱ አስረድተዋል። ፍርድ ቤቱ ፖሊስ በራሱ ከእስር ሲፈታ አስቀድሞ እንዲያሳውቅ አዟል።

መርማሪ ፖሊስ ከዚህ በተጨማሪም በኢቲቪ ጋዜጠኛ ፍጹም የሽጥላ ላይ ያደረገውን ምርመራ ለፍርድ ቤቱ አስረድቷል። መርማሪ ፖሊስ ከዚህ በተጨማሪም በኢቲቪ ጋዜጠኛ ፍጹም የሽጥላ ላይ ያደረገውን ምርመራ ለፍርድ ቤቱ አስረድቷል።

በዚህም ጋዜጠኛ ፍጹም የብረታ ብረትና ኢንጅነሪንግ ኮርፖሬሽን (ሜቴክ) አባል ነኝ በማለት ለራሷና ለሌላ አንድ ግለሰብ የአባልነት ደብዳቤ በማጻፍ ለመንግስት ስራ በሚል አሜሪካ መሄዷን ጠቅሷል።

በአጠቃላይም 23 ሺህ ዶላር ለአሜሪካ ጉዞ በመውሰድ ትዕግስት ታደሰ ከሜቴክ ሕብረት ማኑፋክቸሪንግ ኢንዱስትሪ ሐላፊ ጋር ግንኙነት በመፍጠርና ሀብት በማከማቸት፣ 3ኛ አቶ ቸርነት ዳባ፥ 1 ሺህ 80 የእርሻ ተሽከርካሪ ያለአግባብ ግዥ ከቻይና በድለላ በመፈጸም 42 ሚሊየን ዶላር ኪሳራ በማድረስና 7 ሚሊየን ብር በመጠቀም እንደጠረጠራቸው ፖሊስ ገልጿል።

ከዚህ ጋር ተያይዞም ፖሊስ ቀሪ ስራዎችን ለመጨረስ ተጨማሪ ጊዜ የጠየቀ ሲሆን፥ ፍርድ ቤቱም ተጨማሪ 10 ቀን ፈቅዷል። ከዚህ በተጨማሪም ፖሊስ በሰብዓዊ መብት ጥሰት የተጠረጠሩ የማረሚያ ቤት 9፣ የፌደራል ፖሊስ 5 እና የአዲስ አበባ 2 የፖሊስ አባላት እንዲሁም ቀሪዎቹ የብሄራዊ መረጃና ደህንነት አገልግሎት አጠቃላይ 33 ተጠርጣሪዎች ፈጽመዋቸዋል ያለውን የሰብዓዊ መብት ጥሰት ድርጊት አቅርቧል።

በእነ ብርጋዴር ጄኔራል ጠና ቁርንዲ መዝገብ እየታየ የነበረው የ26 ተጠርጣሪዎች ጉዳይ መደበኛ ሰዓት ስላለቀ ለነገ በይደር የተቀጠረ ሲሆን፥ የሰብዓዊ መብት ጥሰት አድርሰዋል የተባሉ ተጠርጣሪዎች ጉዳይ ግን እየታየ ነው።

FBC

Advertisements

Leave a Reply

This site uses Akismet to reduce spam. Learn how your comment data is processed.

%d bloggers like this: