Advertisements

አደዋ -የሚኒልክ እጅ ስራ !!!

#ይገርመኃል_ሸዋ – via Isho Birhan –


ሚኒሊክ ልትጠላዉ ትችላለህ ፤ ደግሞም ልትወደዉ ትችላለህ ። ነገር ግን ሚኒሊክ ተራ ስብዕና እንዳልነበረ ለመረዳት አይከብድም ። ሚኒሊክ ዉስብስብ ሰዉ ነዉ ። ረቂቅ ነዉ ። ደግሞ አድማጭ ነዉ ።

ሚኒሊክ እንደ ገሞራ እሳት የሚፋጅ ነዉ ። ደግሞ እንደ ምንጭ ዉሃ ገር ነዉ ። ሚኒሊክ ሀገር መመስረት ፣ ግዛት ማስተዳደር ያዉቃል ። ተራ የታሪክ ሰዉ አይደለም ። ጉልህ ነዉ ።

የሚኒሊክን ነገር ለማጉላት ብዬ ከሌሎች ማወዳደር አልፈልግም ። ዳግሞም ማሳነስ ሊሆን ይችላል ።

ዉጫሌ ዉል የአድዋ ጦርነት መነሻ ነዉ ይላሉ ። ፈፅሞ ስህተት ነዉ ። የአደዋ ጦርነት መነሻ የበርሊን የቅኝ ገዢዎች ዉል ነዉ ። አዉሮፓ አፍሪካን ለመቀራመት የተስማማዉ በበርሊን ስምምነት ነዉ ። ያን ለማስፈፀም አዉሮፓዉያን በዉድም ፣ በዉልም ፣ በግድም አድርገዉታል ። በዉል ወደ ቅኝ ግዛት የገቡ ብዙ ናቸዉ ።

ጣሊያን ለሚኒሊክ የዉጫሌን ዉል ስታቀርብለት ፣ ሚኒሊክ ሳይገባዉ ቀርቶ ፣ ተሸዉዶ ፣ ወይ ገር ሆኖ ነዉ ማለት ደካማ የታሪክ ተማሪ ከመሆን የመጣ ነዉ ።

የዉጫሌ ዉል የተፈረመዉ አፄ ዮሓንስ በሞቱ በ 10 ቀናት ዉስጥ ነዉ ። የኣደዋ ጦርነት የተካሄደዉ አፄ ዮሓንስ ከሞቱ ከ 5 ዓመት በሗላ ነዉ ።

ሚኒሊክ የዉጫሌን ዉል በመፈረም የራሱን ጉልበት እስኪያጠናክር ግዜ መግዣ ነዉ ያደረገዉ ። ሚኒሊክ ከፍ ለማለት ዝቅ ማለትን ያዉቃል ።

እንደ ጣይቱ የሚፋጅ እሳት ፣ እንደ ልብ ወዳጁ ራስ መኮንን የረጋ ዉሃ ብቻ ቢሆን ፣ ሀገርም አይሰራም ፣ መንግስቱንም አያፀናም ነበር ።

ዉጫሌ በተፈረመበት ወቅት ሚኒሊክ ፣ ብዙ ጠላቶች ነበሩት ። ተጨማሪ ጠላት ጣሊያንን ማድረግ ስላልወደደ የፈረመዉ ነዉ ። የዉጫሌ ዉል ኖረ አልኖረ ፣ ጣሊያን ኢትዮጵያ ን መዉረሯ እንደማይቀር የሚታወቀዉማ ፣ የትግራይና ኤርትራ መኳንንት ጥሩ አድርጋ ስትክድ በማየት ነዉ ። ሚኒሊክ ግን ጦርነቱን ቢያንስ እሱ በመረጠ ግዜ እንዲሆን ማድረግ ችሏል ።

ሚኒሊክ ሁሉን ያዳምጣል ። በቅንም ይረዳል ። ዓላማዉን አይስትም ። ብልሃተኛ ነዉ ።

የአምባላጄ ጦርነት ፣ የመቀሌ ከበባ በአሸናፊነት ሲያልፍ ፣ በሚኒሊክ ዉሳኔ የሚቆጡ ብዙ ነበሩ ። ጣሊያኖችን ቢማርክም መልሶ እንደዉም ከመጋዣ (ፈረስና በቅሎ ) ጋር ላካቸዉ እያሉ የሚወቅሱት ነበሩ ። ሚኒሊክ ግን ጦርነት የሚገጥምበትን ቦታ እየመረጠ ነበር ። የሱ መኳንንት የሚያዉቁትን ሚኒሊክ ጠፍቶት አይደለም ።

ከባድ ስትራቴጂስት ስለነበረ ነዉ ።

ሚኒሊክ ያሰለፈዉን ሓይል ያዉቀዋል ። ከቴድሮስ እስከ ራስ ዉቤ ፣ ወርቂትና ተዋበች ፣ እስከ ዮሓንስና ጎበና የነበሩ ጦርነቶችን ፣ በአይኑ ያየና የሰለጠ ንጉስ ነዉ ። ጦርነት አዋቂ ነዉ ።

የቻይናዉ ታዋቂ የጦር ጀነራል – ሱን ሱ ” ሓይል እንዳለህ ስታዉቅ ፣ ደካማ ምሰል ” ያለዉን ሚኒሊክ ፈፅሞታል ።

ጣሊያን አደዋ ላይ የዘልዓለም ዉርደት እስክትከናነብ ፣ በዚህ የሚኒሊክ ብልጠት ተሸዉዳለች ። ሚኒሊክም ኣደዋ እስኪደርስ ድረስ የሚፋጅ ነብር መሆኑን ደብቆ ቆይቷል ።

አምስት ወር የተደረገ ጉዞ ፣ የስምንት ሰዓት አጭር ጦርነት የሆነዉ ፣ በዚህች አስደናቂ የሚኒሊክ ብልሃት ነዉ ።

ሚኒሊክ ያደረጋቸዉ ነገሮች ፣ የፈፀማቸዉ ታሪኮች ፣ የሰበሰባቸዉ ሸንጎዎች ፣ የወሰናቸዉ ዉሳኔዎች በእርግጠኝነት የሚሊክን ልህቀት የሚያገኑ ናቸዉ ።

ኣደዋ – በሚኒሊክ ተመርጦ ፣ በሚኒሊክ ታቅዶ ፣ በሚኒሊክ ተመርቶ ፣ የተፈፀመ ጀብዱ ነዉ ።

ለዚያም ነዉ ሚኒሊክ የሀገር መሪ ብቻ ሳይሆን ሀገር መስራች የሚባለዉ ።

ከዚህ መለስ ስላለዉ የታሪክ ፋይዳ ፣ ዉጤት ፣ ጥቅምና ጉዳት እንነጋገር እንጂ ሁነቱ ዳግም ላይመለስ ፣ በሚኒሊክ ተፈፅሟል ።

***

ይገርምሃል ሸዋ !!!

Advertisements


Categories: Head News/መሪ ዜና, opinion/ ምልከታ

Tags:

Leave a Reply

This site uses Akismet to reduce spam. Learn how your comment data is processed.

%d bloggers like this: