August 23, 2019

400 ሚሊዮን የወጣባቸው የኦዳ አውቶቡሶች አገልግሎት ሊጀምሩ ነው – ምስራቅ አፍሪካን በየብስ ለማስተሳሰር አቅዷል

ኦዳ የተቀናጀ የትራንስፖርት አገልግሎት በ400ሚሊዮን ብር ከአውሮፓ ገበያ የገዛቸውን 50 አውቶቡሶች ከአንድ ወር በኋላ ሙሉ በሙሉ ወደ አገልግሎት ሊያስገባ መሆኑ ተጠቆመ፡፡ ተቋሙ በየብስ ትራንስፖርት አገልግሎት ምስራቅ አፍሪካን ለማስተሳሰር እየሰራ ይገኛል፡፡

የኦዳ የተቀናጀ የትራንስፖርት አገልግሎት ዋና ሥራ አስፈጻሚ አቶ እሸቱ ዘለቀ በተለይ ለአዲስ ዘመን ጋዜጣ እንደተናገሩት፤ ተቋሙ የተመሠረተው በአገር አቀፍ ደረጃ የሚስተዋለውን የማህበረሰቡን የኢኮኖሚ ጥያቄ ለመፍታት ጭምር ሲሆን፤ በአሁኑ ወቅትም አስተማማኝነታቸው የተረጋግጠ 50  አውቶቡሶች ከአውሮፓ ገበያ በመግዛት የህብረተሰቡን የትራንስፖርት ችግር ለማቃለል እየሰራ ይገኛል፡፡ ከ50ዎቹ አውቶቡሶች ውስጥ አስቀድሞ አራቱን አገር ቤት በማስገባት ሙከራ እየተደረገባቸው ይገኛል፡ ፡ ውጤታማነታቸውም ተረጋግጧል፡፡ የተቀሩት 46 አውቶቡሶች አዳማ ደርሰዋል፡፡ ከአንድ ወር በኋላም በአገሪቱ የተለያዩ አካባቢዎች ሙሉ በሙሉ አገልግሎት ይሰጣሉ፡፡

እንደ ዋና ሥራ አስፈጻሚው ገለጻ፤ አውቶቡሶቹ የስዊድን ኩባንያ ከሆነው ቮልቮ የተገዙ ሲሆን፤ እያንዳንዳቸው ስምንት ሚሊዮን ብር ወጪ ተደርጎባቸዋል፡፡ በአሁኑ ወቅት አራቱ አውቶቡሶች በድሬዳዋ፤ በነቀምት፣ በሻሸመኔና በሀዋሳ መስመሮች አገልግሎት በመስጠት ላይ ናቸው፡፡ የኦዳ አውቶቡሶች ትራንስፖርት ሙሉ በሙሉ አገልግሎት ሲጀምርም በአገሪቷ በአራቱም አቅጣጫዎች የስምሪት አገልግሎት ይሰጣል፡፡ አውቶቡሶቹ ዘመናዊ የመቆጣጠሪያ መሳሪያ የሚገጠምላቸው ሲሆን ቁጥጥሩን በአንድ ማዕከል ሆኖ ለመምራት የሚያስችል ሲስተም እየተዘረጋ ነው፡፡ ተቋሙ እየጀመረ ባለው የትራንስፖርት አገልግሎትም እስካሁን ሹፌሮችንና ኦፊሰሮችን ጨምሮ 200 ለሚደርሱ ዜጎች የሥራ እድል ፈጥሯል፡፡

አገልግሎቱ ከአገር ውስጥ በተጨማሪ ኢትዮጵያን ከምስራቅ አፍሪካ ጋር የሚያስተሳስር ሲሆን፤ ከፌዴራል ትራንስፖርት ባለስልጣን ጋር በመነጋገር እንደ አስመራ፣ ጅቡቲ፣ ጁባ፣ ሞምባሳና ካርቱም የመሳሰሉትን ከተሞች መዳረሻ ለማድረግ እየሰራ እንደሚገኝ ሥራ አስፈጻሚው አስታውቀዋል፡፡ በሶስት ዓመታት ውስጥም ወደ 300የሚጠጉ ተጨማሪ አውቶቡሶች በማስገባት አገልግሎት እንደሚሰጡና ይህም አገሪቱ ውስጥ ያለውን የትራንስፖርት እጥረት ለመቅረፍ እንደሚያግዝ ገልጸዋል፡፡ ይህንን ለማድረግ የተደራጀ ዘመናዊ አሰራር እንደሚዘረጉና በርካታ የሰው ኃይል ወደ ሥራው እንደሚያሰማሩም ጠቁመዋል፡፡

ተቋሙ ለሌሎች መሰል ተቋማት ምሳሌ ለመሆንና፤ በተለይ በሌሎች አገሮች የሚታየውን ውጤታማ የትራንስፖርት ስርዓትና ተሞክሮ በመቀመር ኢትዮጵያ በዘርፉ ያሉባትን ተግዳሮቶች እንድትወጣ ትኩረት አድርጎ ለመስራት ቁርጠኛ መሆኑን ዋና ሥራ አስፈጻሚው ተናግረዋል፡፡

አዲስ ዘመን ነሀሴ 17/2011

አዲሱ ገረመው

Leave a Reply

%d bloggers like this: