መደባበቅ ባለማስፈለጉ “ሹክ” ልበል በሚል አይጋ ፎረም ላይ የጻፉት አለማየሁ ምህረቴ የጽህፋቸው ማሳረጊያ ” እኛ ካልመራን አገር ትፈርሳለች” የሚለውን የትግራይ ህዝብ ነጻ አውጪ ግንባር ስትራቴጂክ አካሄድና መዳረሻ ነው። ‘ሁለተኛ ጥፋት ቆሞ ማንቀላፋት’ የሚለው የኢህአዴግ ስራ አስፈጻሚ ስብሰባ ዕርዕስ ተቀይሮ ሁኔታችን የሚገልፀው ‘አገር አጥፍተን እኛም እየጠፋን ነው’ ቢሆን ነው የሚሻላ ሲሉ አቶ ለማ መናገራቸውን፣ እሳቸው ይህንን ሲሉ ተሰብሳቢው ለሁለት መከፈሉን ውስጥ በአማራ ስም ራሳቸውን የሚጠሩት ሚስጢር አሳባቂ ይገልጻሉ።

ለውጡ ከመካሄዱ በፊት ጀምሮ ” አገሪቱን እኛ ካልመራናት ትፈርሳለች” በሚል አሜሪካ ድረስ በተደጋጋሚ ለድርድር በወስዋሾቻቸው አማካይነት ላይ ታች ሲሉ እንደነበር መረጃ ላለው ህዝብ፣ ከለውጡም በሁዋላ አዲሱ የኢህአዴግ አመራር አገር መምራት እንደማይችል የድርድር አቋማቸውን ወደ ገሃድ ስብከት መቀየራቸውን ለሚረዳ ሕዝብ፣ ከዛም በሁዋላ ” እረኛውን ምታ በጎቹ ይበተናሉ” በሚል መርህ ሰፊ የማተራመስ ዘመቻ እንደሚካሄድ ለሚያውቅና ምስክር እንደ አሸን በሚቀርብበት ሃቅ… ሁሉም ተረስቶ አቶ ለማ የቀድሞው አመራር ናፋቂ ሆነው ቀረቡ።

“የኢትዮጵያ ሁኔታ ሌላ፣ የኢህአዴግ ፍርስራሽ የሚወያየው ሌላ ነው። ጥልቅ ተሃድሶ በስልጣን ናፋቂዎች በመቀማቱ አገራችን በከፍተኛና መግለፅ በሚከብድ ዘግናኝ ሁኔታ ላይ ትገኛለች። ነገ ዛሬ ፈርሳ ትበታተናለች ተብላ እየተጠበቀች ነው። ቁልፉ ጥያቄ አገር እንዴት እናድን ነው። አገር የሚድነው በህገ መንግስትና በህገመንግስቱ ብቻ ስንመራ ነው። አገር ሲኖር ነው ህገ መንግስቱን በህገመንግስቱ መሰረት ማሻሻል የምንችለው። ኢህአዴግ ሊያድናት አይችልም። የፈረሰ ድርጅት ሊያድነን አይችልምና። የዶክተር አብይ ዕቃ ዕቃ ጫወታ ገደል እየከተተን ነው። ሁሉም እውነተኛ የአገር ወዳጅ ተደራጅቶ መክሮ ከኢትዮጵያ ህዝቦች ጎን በመሰለፍ አገር የማዳን አጀንዳ ቀዳሚም ጊዜ የማይሰጥም ነው ብሎ ይነሳ ” ሲል የሚያትተው የማጠልሻ ጽሁፍ የኢትዮጵያ ሕዝብ “ህወሃት ማረኝ” እንዲል የሚገፋፋና የለውጡን አራማጆች የመግፋት ስልታዊ እንቅስቃሴ ለመተግበር ህዝብን ማዘጋጃ አይነት የዲንቢጦች ስልት ነው።

ከሁሉም በላይ አስቂኝ የሚሆነው ዶክተር አብይ ለተሰብሳቢዎቹ ጓዶች ” …አያስፈልግም እንጂ እዚህ ስብሰባ ጠርቻቹሁ ወታደሮች ጠርቼ ልገድላቹሁ እችላለሁ። ቤቱ ግማሹ አጉረመረመ። ግማሹ ይስቃል። በመሃልም እንዴት እንደዚህ ትላለህ ያሉም አሉ። ሊቀመንበሩ ቀጥለውም መርዝ በውሃ አድርጌ ልጨርሳቹህ እችላለሁ አሉ” ይላል። አያይዘውም ፕሬዚዳንት ኢሳያስ የአሰብ መንገድ መጠናቀቁን እያበሰሩ ባለበት ሁኔታ፣ ዶከተር አብይ ሲሰድቡዋቸ፣ እንዲሁም የሱዳኑንን ተደራዳሪ ጀነራል ” ድንጋር ራስ” ማለታቸውን ጽሁፉ ያትታል። አስቡት ህወሃት ዶክተር አብይ ለምን በድንገት ኤርትራ ሄዱ የሚል ወባ ይዟት ሳለ መልሰው በቧልት ለማቃቃር፣ ከሱዳንም ጋር ያላቸው ሚስጢራዊና ኢትዮጵያን ያራከሰ ግንኙነት አፈር ስለበላ እዛም ቅሬታ ለመፈጠር ሹክ ባዩ ይዘላብዳል።

የኢትዮጵያ ሕዝብ በምን ሂሳብ የትግራይ ህዝብ ነሳ አውጪ ግንባር እንዲመራው ካሁን በሁዋላ ይመኛል? የሚለው ጥያቄ እንዳለ ሆኖ  ጽሁፉ አቶ ጌታቸው ረዳ ከትግራይ ቲቪ ጋር ካደረጉት ቃለ ምልልስ ጋር መመሳሰሉ ድራማውን ” በድምጽና በጽሁፍ” ያስመስለዋል። እርግጥ ኢህአዴግ በውስጡ ችግር ያለበት ፓርቲ መሆኑ ባያተራጥርም፣ መፍትሄ ፈልገው አገሪቱን ለምርጫ ማድረስ እንዳለባቸው ቢታመንም፣ ከጉባኤ በሁዋላ በሃሜት መንገድ መጓዙ የስትራቴጂውን መጨረሻ አመላካች ይሆናል። ለማንኛውም ሕዝብ አንባቢያን የራሳቸውን ግምት እንዲወስዱ ሹክ የተባሉትን ነጥቦች ከስር አስቀምቻለሁ። ተዝናኑበት። ግን መርምሩት። አብላሉት።

ሰለሞን አጎናፍር አንባቢ

Aiga forum

አንደኛ ሹክ። የኢህአዴግ ስራ አስፈፃሚ ስብሰባ አጀንዳዎች ሁለት ነበሩ። ወቅታዊ አገራዊ ሁኔታ ግምገማና ቀጣይ የሚሰሩ ስራዎች። ሁለተኛው አጀንዳ ስለ ፓርቲ ውህደት ነበር።

ሁለተኛ ሹክ። አቶ ለማ ከረዥም የአሜሪካ አገር ጉዞ በኃላ በስብሰባው ተገኝተዋል። ዶክተር ደብረፅዮን ምክንያቱ ባልታወቀ ምክንያት በስብሰባው አልተገኙም። ሌሎች ሁሉም ነበሩ አቶ ሚሊዮን ጭምር።

ሦስተኛ ሹክ። ስብሰባው እንደተጀመረ የአዴፓ አመራሮች በህወሓት ላይ ፕሮስጀር በተደጋጋሚ እያፈረሳቹሁ … ብለው ምሬት በተሞላበት መንፈስና ሁኔታ ጥቃት ጀመሩ። ሌሎችም ተከትለው በህወሓት ላይ የተጀመረውን ጥቃት ተቀላቀሉ።  የኢህአዴግ ዲሲፒሊናዊ የዲሞክራሲያዊ ማዕከላዊነት አሰራር ጣሳቹህ ብለው አምርረው ወቀሱ። መርህ በማፍረስ ህወሓት የውስጥ ገበናችንን ወደ ውጭ ማጋለጡ ትክክል አይደለም አሉ። ነገሩን ስብሰባ እንዲጠራ ጠይቆ በዝግ ስብሰባ እንዲታይ ማስደረግ እየተቻለ መግለጫ ማውጣት አልነበረበትም አሉ። የፀረ-ህወሓት ቃል ኪዳን ግንባር አሁንም እንደጠበቀ ይመስላል። ህወሓት ዛሬ ጉድ ሆኑ አለቀላቸው ብሎ አድፍጦ ምንም ቃል ሳይተነፍስ የሚያዳምጥም ቀላል ያልሆነ አባል አለ። አጎንብሶ መልሶ የማያየውና የማያነበውን ማስታወሻ ላይ የሚቸከችክ እንደዛው። ህወሓት ተራው ደርሶ ቀጠለ። አምርረው ግን ቀስ ብለው በትዕግስት ጉዳዩ በመካከላችን ያለው ችግር ልዩነት ፕሮስጀራል ቢሆን ነሮ ምንኛ በታደልን ብለው ጀመሩ። ግን ባለመታደል ሆኖ ልዩነታችን ከፕሮሲጀር በላይ ነው። እኛና እናንተ የተለያየንው በመስመር ነው። የአብዮታዊ ዲሞክራሲን መስመር አሽቀንጥራችሁ የኒዮ-ሌበራሊዝም አቀንቃኝ ነን ከምትሉ ጋር ምንም አንድ የሚያደርገን ነገር የለም አሉ። ፕሮሲጀር ይከበር የምትሉት መጀመርያ ፕሮሲጀሩ የዲሞክራሲያዊ ማዕከላዊነት የፓርቲ እስርቤት አሰራር ነው ብሎ አሽቀንጥሮ የጣለው ማን ሆኖ ነው? ብለው ሞጎቱ። ህገ መንግስቱን በአደባባይ የሚቃወምና በተግባር እያፈረሰ ካለ የኢህአዴግ ፓርቲ አባላት ጋር ችግርና ልዩነት እንጂ እንዴት ተብሎ ፕሮሲጀራዊ አንድነት ይኖረናል። የትኛው ነው እንዴ የሚቀድመው? በይዘት ተለያይተን በፕሮሲጀርና በዲሲፒሊን እንዴት እንጠያየቃለን? ፈደራሊዝም አልሰራም አሃዳዊ እንመለስ ብላቹሁ ይህን መፈክር ከሚያሰሙ የፋሽስት ደርግ ርዝርዦች ግንቦት ሰባትና ሌሎች አሰላለፋቹህን ካሳመራቹህ ጋር እንዴት አንድ እንሆናለን? ይህ ሁኔታቹህ ደግሞ አገራችን አሁን ለደረሰችበት ፈታኝ የመበተን አደጋ አፋፍ ላይ እንድትሆን ዳረጋት በማለት እንደሁሌም ህዋሕቶች ያላቸውን ፅኑ አቃምና ልዩነታቸውን ሲያቀርቡ አዲሱ ቤት ፀጥ ረጭ ብሎ ተሰብሳቢዎቹ በድንጋጤ ክው ብሎው ያዳምጡ ነበር አሉ።

አራተኛ ሹክ። ማፈግፈግ አይሉት ሽወዳ የህወሓትን መልስ ያልጠበቁት የኢህአዴግ የለውጥ መሪ ነን ባዮች ፈጥነው ልዩነት የለንም አሉ። አብዮታዊ ዲሞክራሲ መመርያችን ነው። ህገ መንግስቱን በተለይ ፌደራሊዙም አማራጭ የሌለው ስርዓት ነው። ምርጫም ማን አባቱ ያስረዝመዋል በወቅቱ ይካሄዳል ተባለ። ለአንድ ዓመት ተኩል ያልተናገርዋቸውና ሲፀየፏቸው የከረሙትን አብዮታዊ ዲሞክራሲና ፌደራሊዝም የኛ ነው አሉ። ቀጠሉ ምንም ልዩነት የለንም። ምርጫውም በህገመንግስቱ እንጂ እኛ የምንወስነው አይደለም አሉ። አሁን ጥቃቱ ከህዝብ አልፎ ወደ ፖለቲካ አመራሩ እያነጣጠረ ነው፣ ጎበዝ በአንድነት እንመክተው እንጂ በሌለን ልዩነት አንሟገት አሉ። የለውጥ መሪውቹ ነን ባዮችም ዶክተር አብይ ለጥቀው አለቃህን ተከተል ይመስል ምክትል ሊቀምበሩ ደመቀ መኮነን እንደሁሌም አይናቸውን አፍጥጠው የግምባራቸውን ቆዳ ሰብሰብ ዘርጋ እያደረጉ አንድ ነን ልዩነት የለንም አሉ። ምን ግድ አላቸው በቀጥታ ስርጭት አይተላለፍ። እዚህ አደራሽ ውስጥ ውሸት ይደሰኩሩና በኃላ በመግለጫ ይሸፋፉንታል። ህወሓት እንደዛ አልነበረም ብሎ መግለጫውን ሲቃወም ደግሞ ጆሮ ዳባ ይሉታል።

አዴፓዎች የሰጠንነው መግለጫ አሳፋሪ ነው። በስሜት ተገፋፍተን ነው። አንድ ላይ የታገለን ድርጅት እንደዛ ማለታችን እኛንም አርባ ዓመት እንደበግ ለምን እየተጎተትን ቆየን የሚል ጥያቄ የሚያስነሳ ነው አሉ። ገሚሶቹ የአዴፓ ስራ አስፈፃሚ ኮሚቴ አባላት የአዴፓ መግለጫን ስንሰማ ደነገጥን ይላሉ። መግለጫው የጋራ እንዳልነበረ ፍንጭ በሚሰጥ አነጋገር።

የህወሓት አባላትም መግለጫ ማውጣታችን በይዘትም በፕሮሲጀርም ትክክልና ወቅታዊ ነው አሉ። በአዴፓ ውስጥ የተፈፀመ መገዳደል ራሱን ያጥራ ማለታችን ትክክል ነው። የደቡብ ህዝቦችም በፓርላማ ጭምር በሃይል እንፈታዋለን የሲዳማ የክልል ጥያቄ ሲባል ትክክል አይደለም በሰላምና በህገመንግስት ይፈታ ማለት ጣልቃ መግባት አይደለም ይመለከተናል። ለሁሉም የኢህአዴግ አባል ድርጅቶች የሚመለከት ነው ብለው እምነታቸውን ገለፁ።

አምስተኛ ሹክ። ክረምት አይደለ በኢህአዴግ ስራ አስፈፃሚ ኮሚቴ ስብሰባ ትልቅ ያልታሰበ ነጎድጋድ ድምፅ ተሰማ። አትደንግጡ። በኢህአዴግ ስብሰባዎች ለረዥም ጊዜ ድምፃቸው አሰምተው የማያቁት አቶ ለማ በድንገት ተናገሩ። ከሳቸው የለውጥ መሪ ያልተጠበቀ ንግግር ቤቱን በሁለት የከፈለ ሃሳብ አቀረቡ። ንግግራቸውን የጀመሩት በሊቀምበሩ ዶክተር አብይ በተዘጋጀው መወያያ ፅሑፍ አርእስትን በመቃወም ነበር። ‘ሁለተኛ ጥፋት ቆሞ ማንቀላፋት’ የሚለው አርእስት ተቀይሮ ሁኔታችን የሚገልፀው ‘አገር አጥፍተን እኛም እየጠፋን ነው’ ቢሆን ነው የሚሻላ አሉ። ኢህአዴግ ፈርሷል። የለም። ከአሁኑ የፈራረሰው  ኢህአዴግና አገር ከለውጡ በፊት የነበረው ኢህአዴግና አገር ከነችግሮቹ ይሻላል አሉ። ከለውጡ በኃላ እየታዩ ያሉ ችግሮች በአገራችን ታሪክ ተከስተው ታይተው የማያቁ ናቸው። አገር የሚያጠፉ ናቸው። ዋናው ችግራችን ኢህአዴግ ባለመኖሩ ነው። ለውጡ ስለተጠለፈ (hijacked ስለ ተደረገ) ነው ችግር ላይ የወደቅ ነው። መዳን ከፈለግን ኢህአዴግ ወደ ነበረበት ቁመና እንመልሰው። ወይም በሰላማዊ መንገድ እንለያይ አሉ።

ከአቶ ለማ ንግግር በኃላ የአዴፓ፣ ደህዴን፣ እና የኦዲፒ ተናጋሪዎች ለማ ያለው ትክክል ነው ብለው ይጀምሩና ግን ኢህአዴግ አልፈረሰም። በጠና ታሟል ነው ማለት የምንችለው አሉ።

የህወሓት ተናጋሪዎች አቶ ለማን በመደገፍ ከአስር ወር በፊት ኢህአዴግ ፈርሷል ስንል ሰሚ አጣን። ያኔ ፈርሷል ስንል ዝርዝር ምክንያትና መገለጫዎቹም ገልፀናል አሉ።

ስድስተኛ ሹክ። ሁለተኛው አጀንዳ፣ የፓርቲ ውህደት አጀንዳ ቤቱ ሳይወያይበት ቀረ። ለምን እንደሆነ ሹክ ልበላቹህ። ዶክተር አብይ በዚህ አጀንዳ መወያየት ወቅቱ እንዳልሆነ ስላወቁ ተሎ ብለው በየደርጅቱ ተወያይታቹሁ ሪፖርት አድርጉ አሉ። በስብሰባው ወቅት ኢህአዴግ ከፈረሰ ቆይተዋል ብለው ከህወሓት ውጭ የለውጥ መሪ ነን ከሚሉ ሰዎች መነገሩ የፈረሰ ድርጅት ውህደት ያድርግ ብሎ መነጋገሩ ትርጉም የለውም። የመስመር ልዩነት አለን የሚል ክርክር በተነሳበት ወቅት ማን ከማን ሊወሃድ ብለው ሁለተኛው አጀንዳን አጠፏት። አጀንዳ ይሁን ብለህ አፀድቀህ ሳትወያይ ማለፍ ፕሮሲጀር ይፈቅዳል? የፕሮሲጀር ጠበቆች ይመልሱት።

ስምንተኛ ሹክ። ሌላው በዚህ ስብሰባ የታየው ጉዳይ የደቡብ ህዝቦች የክልል እንሁን ጥያቄ በህገ መንግስቱና በህገመንግስቱ ብቻ ደህዴን እንዲመልስላቸው ተሰማመተዋል። ሳይንሳዊ ጥናት እየተባለ ጊዜ መውሰድ የለበትም እንደተባለ ተገልፃል።

ሰባተኛና የመጨረሻ ሹክ። የነሐሴው ስብሰባ ዶክተር አብይ የተደፈሩበት ስብሰባ ነበር። በህወሓት መደፈራቸው አዲስ ነገር አይደለም። መቼም አልተዋቸውም። እሳቸውም ፀረ ለውጥ ብለው ዘግተውት ቆይተዋል። ለምደውቷልም። አዲሱ ዝንባሌ የታየው ከአቶ ለማ ንግግር በኃላ ነው አሉ። የኦዲፒና ደህዴን አባላት የኢህአዴግ ሊቀመንበሩ ሲያጠቃልሉ ‘ደስ ያለህን አታጠቃልል። ይህንንም እኛ ባልነውና ቤቱ ባጠቃለለው ሂድበት’ አሉ አሉ። በለውጡ መሪ በንግግራቸው ጣልቃ ገብተው! በዛን ግዜ ሊቀመንበሩ ደንገጥ አሉ ይባላል። ከዛን ግዝ ጀምሮ ቀናቸው እየጨለመና ባንዴራቸው ዝቅ እያለ መሆኑን ያጤኑ ይመስላል ይላሉ ምንጮቻችን።

ከዚህ በኃላ ዶክተር አብይ ከአጀንዳ ውጭ የተናገሩትን ያልተጠበቀ ንግግር ለመሰናበቻ ሹክ ልበላቹህ። ከለውጡ በኃላ ህወሓትን ሲያመጉሱ ሰምቼ አላውቅም። እንዲህ አሉ። ህወሓት በ1977 እና 1993 ዓመተ ምህረት በድርጅቱ ተፈጥሮ የነበረውን ልዩነቱን በውይይት ተከራክሮ በድምፅ ፈታው። መሳርያ ትጥቅ ስላልነበረው አይደለም። በሰለጠነ መንገድ በውይይት የመፍታት ብቃትና ባህል ስለነበረው ነው። አሁን ግን በደቡብ የምናየው  ውይይት ትተው በድንጋይ አመራሩን ደበደቡ። በቅርቡ ደግሞ አማራ ክልል ውስጥ አመራሩን በጥይት መግደል ተጀመረ። ለምን በውይይት አንፈታውም? አሉ አሉ። ቀጠሉ ከኃላ የሆነ ነገር ይገፋቸዋል። መንግስት መንግስት ነው። የፈለገውን ማድረግ ይችላል። ኮ/ል መንግስቱ መቶ ሃያ የለውጥ ሃዋርያ ሲያስቸግሩት የሚገደለውን ገድሎ ሌላውን ጥግ አስይዞ ይህችን አገር ቀጥ አድርጎ መርቷታል። አያስፈልግም እንጂ እዚህ ስብሰባ ጠርቻቹሁ ወታደሮች ጠርቼ ልገድላቹሁ እችላለሁ። ቤቱ ግማሹ አጉረመረመ። ግማሹ ይስቃል። በመሃልም እንዴት እንደዚህ ትላለህ ያሉም አሉ። ሊቀመንበሩ ቀጥለውም መርዝ በውሃ አድርጌ ልጨርሳቹህ እችላለሁ አሉ። ግን ምንም አያስፈልግም አሉ ተመልሰው። ውይይት ይሻላል አሉ። ሊቀመበሩ ከአንዱ አጀንዳ ወደ አንዱ እየዘለሉ ቀጠሉ። የኤርትራው ኢሳያስ አንስተው እብድ ነው ምን እንደሚያስብ አይታወቅም። ከሱ ጋር መስራት አስቸጋሪ ነው አሉ። እንፈራረም ብለው እሺ እያለ እያገተተው ነው አሉ። ካቢኔውን ሰብስቦ አያቅም። ምን እንደሚያስብ መገመት አይቻልም። ኤርትራ ውስጥ ለውስጥ ሰራዊቷን እያዘጋጀች ነው። ክረምቱ ሲያልቅ ወረራ ፈፅሞ ወደ ጦርነት ሊከተን ይችላል። ሱዳን  እንደምንም ብለን አስማማናቸው ምንም ትምህርት የሌለው ግመል ነጋዴ የነበረ ጄነራል አስቸግሮን ነበር አሉ። አሁንም ማንም ሳይጠይቃቸው የጁቡቲው ኢስማኤል ገሌ ነው እያስቸገረን ያለው። ገና ከኤርትራ ጋር ታርቀዋል ብሎ፣ ወደብ አገልግሎትን ጥለው ይሄዳሉ ብሎ ፈርቶ ክፉኛ እያየኝ ነው። የትናንሽ አገር መሪዎች አስቸጋሪዎች ናቸው። ከአጀንዳ ውጭ ቀደዱ አሉ፡፡ ነገሪየው የትልቅ አገር መሪ ነኝ ቀለል ቀለል አታድርጉኝ ዓይነት ነው መልእክቱ።

የሴራው አካልና መሃንዲስ ሆነው ሳለ ” አሁኑኑ አገራችን ከመፈራረስ እንታደጋት!” ማለት ምን ፍለጋ ነው? ምንስ ማለት ነው?

ሹክ በማለቴ ፕሮሲጀር በወያኔ አነጋገር ዴሞክራሲያዊ ማከላዊነት ጥሼ ሊሆን ይችላል። ላይሆንም ይችላል ግን ህዝብ የማወቅ መብት አለው ብዬ ያደረጉት ስለሆነ ችግር ቢደርስብኝም እሸከመዋለሁ። ገበናችን ከህዝብ እንደብቅ የሚል፣ የለየልት ፀረ ዲሞክራሲና ፀረ ህዝብ ከሆነ ድርጅት ስብሰባ ማጋለጥማ የግድ ነው። ግን ሊቀመንበራችን መርዝ ወይም ጥይት እስኪያጠጡን ድረስ ነው። ሰላም ናፈቀኝ። ልማት ናፈቀኝ። ትያትሩ ይብቃ ለሚል ህዝብ ሹክ ማለት ትንሿ ግዴታዬ ናት ብዬ ይህንን የፈፅምኩት። ሹክ።

የኢትዮጵያ ሁኔታ ሌላ፣ የኢህአዴግ ፍርስራሽ የሚወያየው ሌላ ነው። ጥልቅ ተሃድሶ በስልጣን ናፋቂዎች በመቀማቱ አገራችን በከፍተኛና መግለፅ በሚከብድ ዘግናኝ ሁኔታ ላይ ትገኛለች። ነገ ዛሬ ፈርሳ ትበታተናለች ተብላ እየተጠበቀች ነው። ቁልፉ ጥያቄ አገር እንዴት እናድን ነው። አገር የሚድነው በህገ መንግስትና በህገመንግስቱ ብቻ ስንመራ ነው። አገር ሲኖር ነው ህገ መንግስቱን በህገመንግስቱ መሰረት ማሻሻል የምንችለው። ኢህአዴግ ሊያድናት አይችልም። የፈረሰ ድርጅት ሊያድነን አይችልምና። የዶክተር አብይ ዕቃ ዕቃ ጫወታ ገደል እየከተተን ነው። ሁሉም እውነተኛ የአገር ወዳጅ ተደራጅቶ መክሮ ከኢትዮጵያ ህዝቦች ጎን በመሰለፍ አገር የማዳን አጀንዳ ቀዳሚም ጊዜ የማይሰጥም ነው ብሎ ይነሳ።

አሁኑኑ አገራችን ከመፈራረስ እንታደጋት!